I.
Mar vic loial voloir et jalousie,
ki ens mon cuer se sunt acompaignié;
vendue m'ont mout chier lor compaignie,
car trop m'en voi durement empirié
envers Amors: en ont moilleur marchié
cil qui jalous se font par tricherie,
car il en ont et amors et amie,
et loiautez m'a de joie eslongié.
II.
Teus ameroit toz les jors de sa vie
n'avroit tel tans de prover s'amistié
con j'ai en tant qu'ai ma dame servie;
s'ele deignoit, bien m'avroit assaié.
Mes son cuer voi si forment desvoié
qu'ele croit bien que cil ait deservie
s'amor qui l'a par ses faus dis traïe;
et mi bien fait sont a noient jugié.
III.
Dont m'ochirra la dolours et l'envie
de moi dolant, de mon anemi lié;
a son ami voi ma dame anemie
et de s'amour son anemi aidier;
doublement a mon cuer ma dame irié.
Pour la millor del monde l'oi coisie;
mais or sai bien k'es reliques n'a mie
en molt de lieus ou il saint sont quidié.
IV.
Oï avés ma douce felonie,
dame; pour Dieu, ne vous ait anoiét!
N'est pas amors mais doce derverie
d'un desirier ardant outrequidié
ki mon cuer a si forment desvoiét
ke je ne sai k'est folie.
Si com c'est voirs, m'en doinst Dieus vostre aïe
et vostre gré, que j'ai tres couvoitié.
V.
A vous me renc, dame, pris et loié
en sospirant se met a vostre pié
mes cuers, qui veut qu'envers vos s'umelie
et k'a vos soit ma chanson envoïe;
car il vos a meesme envoié.