I.
Tant ne me sai dementer ne conplaindre
que puisse avoir de ma dolor solaz,
ne de mon cuer ne puis la flanbe estaindre,
dont tante foiz me claim dolent et laz.
cele m'ocit vers qui ne me sai faindre:
ainz sui toz jorz en paine et en porchaz
se ja porrai jusqu'a s'amor ataindre.
II.
Tant faz pour li greveuse penitance
que touz jorz sui en pleurs et en souspir,
et si set bien que je l'aim sanz doutance;
tant com li plest me puet fere languir:
ja pour autrui n'i avrai delivrance,
se n'est par li, que tant aim et desir
que tout i met mon cuer et m'esperance.
III.
Adés amors me semont et atise
de li amer, mes n'i truis fors dangier;
et si l'aim tant de fin cuer sanz faintise
que ne me puis tenir de li prier;
ne sai se ja l'avré a moi conquise,
et neporquant ce me fet rehetier
que l'eve seut percier la pierre bise.
IV.
Dame, mar vi le cler vis et la face,
ou rose et lis florissent chascun jor;
tant m'esbahis que ne sai que je face,
quant je regart vostre fresche color
et vo douz front, qui plus est clers que glace.
Dame, merci! car a trop grant dolor
muir et languis: vostre pitié le sache!
V.
Vainque pitié, douce dame, et droiture!
ne m'i lessiez morir a tel torment!
tant par vous truis touz tens sauvage et dure
que m'ocirrez se vous vient a talent;
de vos penser ne puis fere mesure;
dame, merci! trop me secorez lent,
si me merveil con vostre cuers l'endure.