I.
L'an que rose ne fueille
ne flour ne puet paroir,
que n'oi chanter par brueille
oisel n'au main n'au soir,
adonc flourist mes cuers en un voloir
de fine amour ki m'a en son pooir,
dont ja ne quier issir;
et s'il est nus ki m'en voelle partir,
je nel quier ja savoir, ne Diex nel voelle!
II.
Bien est droiz que m'en dueille,
quant ma doleur desir,
et mieuz aim que ne sueille
ce dont ne puis joïr,
et bien connoiz que n'i doi avenir;
s'amours ne vaint raison, g'i doi faillir,
ce di je tout de voir.
Pour Dieu, amours, vueilliez en nonchaloir
metre raison, tant qu'ele m'i acueille!
III.
Dame, nus maus que j'aie
ne m'est fors alegier,
quar sanz vous ne porroie
vivre, ne je nel quier.
Sanz vous amer ne m'a vie mestier,
se je ne vueill tout le monde anoier
ou aler m'ent morant.
ja dame Dieuz ne m'i doint vivre tant
qu'al siecle anuie et perde amour veraie!
IV.
Par maintes foiz m'esfroie
amours et fait pensant,
et souvent me rapaie
et done cuer joiant;
einsi me fait vivre melleement
d'ire et de bien; ne sai s'ele a talent
que me vueille assaier,
u s'el le fait de gré pour moi irier,
pour esprouver se pour mal requerroie.
V.
Mainte longue semainne
trai, quant sui loig de li,
et passant a grant painne,
souvent les en maudi.
Je n'en puiz rienz, las, quar je desir si
a recevoir cele donc pas n'oubli
les mos ne les samblanz,
ainz m'i recort et m'i sui remembranz,
si m'i confort quant ele m'est lontainne.