I.
[L']autre ier avint en cel autre païs
c'uns chevaliers ot une dame amee.
Tant com la dame fu en son bon pris,
li a s'amour escondite et veee.
puiz fu uns jours qu'ele li dit: – Amis,
menez vous ai par parole mainz dis;
or est l'amour couneüe et moustree:
d'ore en avant serai a vo devis. –
II.
Li chevaliers la reguarda el vis,
si la vit mout pale et descoulouree.
– Dame –, fait il, – certes mal sui baillis
que n'eüstes pieça ceste pensee.
Vostre clers vis, qui sambloit flour de lys,
est si alez, dame, de mal en pis
qu'il m'est avis que me soiez emblee;
a tart avez a moi cest conseill pris. –
III.
Quant la dame s'oï si ramprosner,
grant honte en ot, si dit par sa folie:
– Par Dieu! vassal, jel vous dis pour gaber;
cuidiez vous dont qu'a certes le vous die?
onques nul jour ne me vint en penser.
Savriez vous dont dame de pris amer?
Nenil, par Dieu! Ainz vous prendroit envie
d'un bel vallet baisier et acoler! –
IV.
– Dame –, fait il, – j'ai bien oï parler
de vostre pris, maiz ce n'est ore mie;
et de Troie rai jë oï conter
qu'ele fu ja de mout grant seignorie;
or n'i puet l'en fors les places trouver.
Et si vous lo einsi a escuser
que cil soient reté de l'iresie
qui des or maiz ne vous voudront amer. –
V.
– Par Dieu! vassal, mout avez fol pensé
quant vous m'avez reprouvé mon eage.
Se j'avoie mon jouvent tout usé,
si sui je riche et de si grant parage
c'on m'ameroit a petit de biauté.
Encor n'a pas un mois entier passé
que li Marchis m'envoia son message
et li Barrois a pour m'amour jousté. –
VI.
– Dame –, fait il, – ce vous a molt grevé
que vous fiez en vostre seignorage;
mes tel .vii. ont ja pour vouz sospiré,
se vous estiés fille au roi de Cartage,
qui ja mes jour n'en aront volenté.
On n'aimme paz dame pour parenté,
maiz quant ele est bele et courtoise et sage.
Vouz en savroiz par tanz la verité. –