I.
La doce acordance
d'amors sans descort
velt sans descordance
ke faice un descort
por la descordance
ke sovent recort
la belle, la blance
a cui je m'acort.
Mais ce m'acort
qui j'aim tant fort
et de li sui en dotance;
mais grant deport
ai quant j'en port
au mains d'amors la samblance.
Mais a grant tort
de moi s'estort
quant ens li ai ma fiance,
car a som port
par son effort
m'arive s'amors et lance.
II.
Brunete et blance,
saichiés, sanz dotance,
k'en vos m'esperance
et mon cuer mis ai.
Mais l'acointance
tant m'i desavance
ou autres s'avance
par vous, ke bien sai,
mais n'ai poisance
ke de vo vaillance
faice desevrance,
ne ja ne ferai,
ains ai fiance
ke, sans demorance,
vostre bienvoillance
del tot en arai.
Car autrement convenroit a la fin,
si com on dit, le faus sevrer del fin,
ne nuit ne jor a ce penser ne fin
ke fauseté peüsse traire a fin.
III.
Por coi t'amerai
de cuer v[e]rai
sans esmai,
sans delai,
et serai
en tel assai
se porrai venir
a mon desir
acomplir,
a loisir,
sans fenir,
de cuer entir,
de celi dont m'esmai.
Se s'amor n'ai,
ke dirai?
ke ferai?
je morrai,
quant bien sai
que n'em porrai
ja mais nul jor partir.
A som plaisir
assentir,
sans mentir,
tant desir
que sospir
quant [je] remir
les griés maus ke j'en trai.
IV.
Mais se mon cuer pooit aperchevoir,
por vrai ami me porroit retenoir,
k'ainc ne l'amai certes por dechevoir,
et en la fin en savra bien le voir.
Et s'ensi muir sans vraie amor avoir,
Amors mal gré l'en devera savoir
voir, car bien set et voit mon fin coraige,
ke por s'amor a fait sovent doloir.
Mais tant et prex, tant cortoise et tant saige
ke ens la fin ne me puet mal voloir;
bien l'aperçui quant je par mon folaige
près euc perdu de son cuer le manoir.
Mais je li proi que en son iretaige
soie remis a tos jors por manoir.