| I | |
| U ne nouele amorette que iai. me fait chanter (et) ren- uoisier, Lo cuer en ai amoreset (et) gai. ne ia de ceu partir ne quier. Rose ne lis ne florette de glai. ne lo me fait recomen- cier. fors la blondette por cui ie morrai. se merci ne mi puet aidier. Merci demanz merci requier. merci uuel (et) merci desir. A la blondette lo uuel proier. kautre ne men porroit garir. Nautre ne men porroit aidier. nautre nest tant a mon plaisir. Je la seruirai sen dangier. se tout ne lo me uuet merir |
Une novele amorette que j'ai me fait chanter et renvoisier; le cuer en ai amoroset et gai, ne ja de ceu partir ne quier. Rose ne lis ne florette de glai ne lo me fait recomencier, fors la blondette por cui je morrai se merci ne m'i puet aidier. Merci demanz, merci requier, Merci vuel et merci desir: a la blondette lo vuel proier, k'autre ne m'en porroit garir, n'autre ne m'en porroit aidier, n'autre n'est tant a mon plaisir. Je la servirai sen dangier, se tout ne lo me vuet merir. |
| II | |
| Bele (et) blondette je uos amerai. de boen cuer le- al (et) entier. Ne ja de uos ne me dep(ar)tirai. miez me lairoie depecier. En ceste bone pensee serai. ne nuns ne men poroit getier. Mais t(ro)p me tienent en maluais delai. felon mesdisant losengier. Je redout tant lor enco(m)brier. q(ue) t(ro)p se peinent de t(ra)ir. Cels qui bien aiment senz dangier. ne ia ne les en uoi ioir. Bien se doit la blondette gaitier. kades uue- lent danui seruir. Ne moi ne li nen ont mestier por nostre ioie departir. |
Bele et blondette, je vos amerai de boen cuer leal et entier, ne ja de vos ne me departirai: miez me lairoie depecier. En ceste bone pensee serai, ne nuns ne m'en poroit getier; mais trop me tienent en malvais delai felon mesdisant losengier. Je redout tant lor encombrier, que trop se peinent de traïr cels qui bien aiment senz dangier, ne ja ne les en voi joïr! Bien se doit la blondette gaitier, k'adès vuelent d'anui servir; ne moi ne li n'en ont mestier por nostre joie departir. |
| III | |
| Laut(ri)er un ior a lentree de mai. loi chanter en un uergier. mais onques mais si bele nesgardai. ceu uos porroie fiancier. Sades cortois deus (et) quele amoret- te ai. sele la me uuet outroier. Ne iamais ior senz ioie ne serai. se de samor puis esploitier.Je desir tant li embracier. (et) li ueoir. (et) li oir. Se de li ai un douz baisier.nus mals ne me poroit uenir. Ne men porroient foriugier maluaise gent par lor mentir. Con q(ue) me doie delaier. ie latendrai tot a loisir. ke fine amors me fait cuidier boens seruises ne puet pe rir. |
L'autrier, un jor a l'entree de mai, l'oï chanter en un vergier, mais onques mais si bele n'esgardai, ceu vos porroie fiancier. Sades, cortois Deus, et quele amorette ai, s'ele la me vuet outroier, ne jamais jor senz joie ne serai, se de s'amor puis esploitier! je desir tant li embracier et li veoir et li oïr, se de li ai un douz baisier, nus mals ne me poroit venir; ne m'en porroient forjugier malvaise gent par lor mentir. Con que me doie delaier, je l'atendrai tot a loisir, ke Fine Amors me fait cuidier boens servises ne puet perir. |