 |
Bernard QAn uei la laudeta mouer. De ioi sas alas contral rai. Qi soblidet laissa cazer. Per la dolzor qal cor lin uai. Hai com granz enueia men ue. De cui qe ueia iauzion. Merueillas mai qar de se. Lo cors desirer non fon. |
 |
Ha las qant cuiaua saber. Damor (e) qant petit ensai. Qar eu damar nom puosc tener. Celei don ia pro non aurai. Tolt ma mon cor (e) tolt ma me. Et si mezeis (e) tot lo mon. Et qant sim tolc nom laissa re. Mas desirer (e) cor uolon. |
  |
De las do(m)pnas me desesper. Iamais en lor nom fierai. Caissi com las suoill captener. En aissi las descaptenrai. Pois uei qe una pro nom te. Ues lei qem destrui em confon. Totas las dopt (e) las mescre. Qe ben sai qatretals se son. |
 |
Merces es perduda per uer. Et eu non osaubi anc mai. Qe cil qe plus en degra auer. Non agues (e) on la qerrai. Ha com mal senbla qi la ue. Qadaqest caitiu desiron. Qe ia ses lei non aurai be. Laisse morir qe noill auon. |
 |
Pos amidonz no pot ualer. Deus ni merces nil dreich qeu ai. Ni a lei no uen a plaisser. Qeill man iamais nollil dirai. Aissim part dalei em recre. Mort ma (e) per mort li respon. Et uaomen sela nom rete. Chaitius en eisil no sai on. |
 |
Anc non agui de mi poder. Ni no fui meus deslor enchai. Qem laisset de mos oillz ueder. En un miraill qe molt mi plai. Miraill pois me mirei en te. Man mort li sospir de prion. Caissim perde com perdet se. Lo bel narcius en la fon. |
  |
De cho fai ben femna parer. Mado(m)pna per qeull lo retrai. Qe cho com uol non uol uoler. Et cho com li deueda fai. Cauz soi en mala merce. Et ai ben fait de fols un pon. Ni no sai per qe me deue. Mas car poiai trop contra mon. |
 |
Tristeza non aue de me. Et uamen marriz no sai on. De chantar me tuoill em recre. Et de ioi (e) damor mescon. |