I.
Qant li malos brut
sor la flor novele
et li solaus luist
qui tout resplandelle,
lour mi plaist la damoizelle,
qui est jone et jante et belle,
et por li suis an grant joie,
aseis plus que ne soloie.
Je suis siens et elle est moie.
Dehait ait qui ne l'otroie,
que por riens n'en partiroie!
II.
Joie et grant desduit
ai por la donselle.
g'i pans jor et nuit
et s'amor m'apelle.
Je l'oï an la praielle
chanter an la fontenelle
par desoz une codroie,
soule, an un bliaut de soie;
chapial d'or ot et coroie.
Deus! com elle s'esbanoie
et com elle se cointoie!
III.
Ki ainmet valour
et met sa pansee
a leaul amor
et il l'ait trovee,
bien ait sa joie doblee:
n'an doit partir por riens nee.
Qui se met an avanture
d'amer, Amor l'aseüre
de joie et d'anvoiseüre
et de bien et de mesure:
toute sa vie li dure.
IV.
J'ain lou grant signor
c'an haut honor beie,
large doneour,
et bien fiert d'espee,
cant il vient a la melee:
iceu me plaist et agree;
mais des mavais n'ai ge cure,
c'on ne s'en poroit desduire;
plain sont de malle faiture,
n'i ait raison ne droiture;
fous est qui s'i aseüre!
V.
J'ain lou chevalier
qui bien met sa terre
an bial tornoier
et a lous conquere:
ceu li doit an bien soferre.
Puis qu'il son avoir n'anserre,
brut d'armes et druerie
maintient et chevalerie
aveu bone compaignie,
lors avra bien deservie
l'amor de sa douce amie.
VI.
Je ne quier aler
an poingnis de gerre,
mais ou froit celier,
la me puet on querre.
A boin ferreit que bien ferre,
la voil mon argent offerre,
et se j'ai trutes flories,
gastiaus et poilles rosties,
bien i vodroie m'amie,
qui sanble rose espanie,
por faire une raverdie.