I.
En ceste note dirai
d'une amorete que j'ai,
et pour li m'envoiserai
et bauz et joianz serai:
l'en doit bien pour li chanter
et renvoisier et jouer
et son cors tenir plus gai
et de robes acesmer
et chapiau de flors porter
ausi comme el mois de mai.
II.
Trés l'eure que l'esgardai,
onques puis ne l'entroubliai;
adès i pens et penserai:
quant la vois, ne puis durer,
ne dormir, ne reposer.
Biau trés douz Deus, que ferai?
la paine que pour li trai,
ne sai conment li dirai:
de ce sui en grant esmai
oncore a dire li ai;
quant merci n'i puis trouver
et je muir por bien amer,
amoreusement morrai.
III.
Je ne cuit pas ensi morir,
s'ele mi voloit retenir
en bien amer, en biau servir;
et du tout sui a son plesir
ne je ne m'en qier departir,
mès toz jorz serai ses amis.
IV.
Hé! bele et blonde et avenant,
cortoise et sage et bien parlant,
a vous me doig, a vous me rent
et tout sui vostres sanz faillir.
Hé! bele, un besier vous demant,
et, se je l'ai, je vous creant
nul mal ne m'en porroit venir.
V.
Ma bele douce amie,
la rose est espanie;
desouz l'ente florie
la vostre conpaignie
mi fet mult grant aïe.
vos serez bien servie
de crasse oe rostie
et bevrons vin sus lie,
si merrons bone vie.
VI.
Bele trés douce amie,
Colin Muset vos prie
por Deu n'obliez mie
solaz ne compagnie,
Amors ne druerie:
si ferez cortoisie!
Ceste note est fenie.