[c.242]
 |
En aqes gai son (et) legier. Fai descort sen alegranza. De uos qem tolez alegrer. Et solaz (et) benenanza. Et auez me dat cosier. Et traball (et) malenanza. Gran pechat nauret a sobrer. Se nom fai qalqe pidanza. Las qe farai. Qeu no lo sai. Pois non ai. Nul bon conort. Per uos morrai. Et molt me plai. Som dis qe uos maiai mort. Per o morir non uolria. Se ben es riz (et) ueraia. Ni mester nocam seria. Humil dolza do(m)pna gaia. Merci naiaz. De mi seus plaz. Qar es pro (et) couenenta. Et ben sapchaz. Et min credaz. Qe ren tant no matalenta. Dirai uos com sim pres laltrer. Qan fui al entran de franza. Qeu nagi tan gran desier. Et tan granda remenbranza. Del uostre bel cors plasenter. |
[c.243]
 |
Orgoillos dumil senblanza. Cades uengi lo dret sentier. Plus dret non es dart ne lanza. Qan sa ne lai. Do(m)pna al cors gai. Non pris pois ues altre port. Dem don esmai. Seu ia nistrai. Et sauez de mi gran tort. Ne per neguna qe sia. Nom dil cor qe ia nastraia. Et fesses tot qant uolria. Et si sai tal qe nassaia. Melz soi onraz. Qe nul hom naz. Sol uostramor me consenta. O qem sofraz. Qen amoraz. Sia de uos do(m)pna genta. Ren tan non plaz. Com fai burlaz. Per la contessa ualenta. Qar prez lli es daz. Et autriaz. Tant qe ual le meillor trenta. Tescort a(n)naz. Tost (et) uiaz. En ben uenguz qe manenta. De ric solaz. Pois prez onraz. Non a tan bona parenta. |