![Versione stampabile Versione stampabile](https://letteraturaeuropea.let.uniroma1.it/sites/all/modules/print/icons/print_icon.gif)
![PDF version PDF version](https://letteraturaeuropea.let.uniroma1.it/sites/all/modules/print/icons/pdf_icon.gif)
I.
Bien cuidai vivre sans amour
desore en pais tout mon aé,
mais retrait m'a en la folour
mes cuers dont l'avoie escapé;
enpris ai grenour folie
que li faus enfes ki crie
pour la bele estoile avoir
qu'il voit haut et cler seoir.
II.
Coument que je me desespoir,
bien m'a amors guerredouné
che que je l'ai a mon pooir
servie sans desloiauté,
qui roi m'a fait de folie.
si se gart bien que s'i fie,
que si haut don set merir
ceus qui servent sans traïr.
III.
N'est pas merveilles se m'aïr
vers amour qui tant m'a grevé.
Diex, car le peüse tenir
un seul jour a ma volenté!
el conperroit sa folie
(si me fache Dieus aïe!):
a morir li convenroit,
se ma dame ne vaincoit.
IV.
Aï, frans cuers qui tant convoit,
ne beë a ma foleté!
bien sai q'en vous amer n'ai droit,
s'amour ne m'i eüst douné;
mais esforchier fait folie
si con fait nés qui vens guie,
qi va la ou vens 1'enpaint,
ke toute esmië et fraint.
V.
Ha, dame ou nus biens ne soufraint,
merchi pour franchise et pour gré!
puis qu'en vous sont tot mal estaint
et tout bien a droit alumé,
conoissiez dont la folie
me vient qui me tolt la vie,
qu'a rien n'os faire clamor,
s'a vos non, de ma dolor!
VI.
Canchon, ma plaisans hachie
me salue et si li prie
que, pour Dieu et pour s'ounour,
n'ait ja l'us de traïtour!