I.
Assatz es or’oimai q’eu chant;
tant ai estat acondurmitz
c’anc mos chanz non fon lueing auzitz,
mas era·m vau ja reveilhant
et irei mon joi recobran
contre l’ivern e·l freig aurei.
II.
De joi no·m cal [salhir] enan,
c’anc un sol jorn no·n fui garnitz;
et es m’al cor prion – sos ditz –
si q’entre gens vau sospiran
lo dezirier c’ai d’amor gran;
ni dorm ni veil, ni aug ni vei.
III.
S’anc per amor anei veillian,
ni·n fui anc fols ni trassailitz,
ni cambïatz per chamjairitz,
era·n lau Dieu e saint Joan,
c’ab tal amor vau amoran
c’anc no·m chamjec per autre mei.
IV.
Cesta non cug qe ja·m [...]an,
s’ieu ja de leis no soi garnitz;
ni no·n soi tant afolatitz
que ja re·il qeira ni·l deman,
petit ni pro, ni tant ni qant,
ni mal ni be, ni re ni qei.
V.
Tant la sei coinda e prezan,
e·l faigz de leis es tant eslitz,
qe sai me tenc per enreqitz,
e lai a Jhesu la coman
la nueg e·l jorn e·l mes e l’an,
c’aissi soi sieus con esser dei.
VI.
Plas es lo vers, vauc l’afinan
ses mot vila, fals, apostitz;
et es totz enaissi noiritz
c’ap motz politz lo vau uzan;
e tot ades va·s meilluran
s’es qi be·l chant ni be·l desplei.