Wolf - Rosenstein

Versione stampabilePDF version

I.
Assatz es or’ oimai q’eu chant   
tant ai estat acondurmitz        
c’anc mos chanz non fon lueing auzitz;
mas era·m vau ja reveilhant,          
et irei mon joi recobran              
contre l’ivern e·l freig aurei.       

II.
De joi no·m cal [fugir] enan,         
c’anc un sol jorn no·n fui garnitz;    
et es m’al cor prion sorzitz,        
si q’entre gens vau sospiran          
lo dezirier c’ai d’amor gran;        
ni dorm ni veil, ni aug ni vei.       

III.
S’anc per amor anei veilhan,         
ni·n fui anc fols ni trassailitz,     
ni cambiatz per chamjaritz,          
era·n lau Dieu e Saint Joan,          
c’ab tal amor vau amoran              
c’anc non chamjec per autre mei.      

IV.
Cesta non cug qe ja m'[engan],
s’ieu ja de leis no soi garnitz;      
ni no·n soi tant afolatitz           
qe ja re·il qeira ni·l deman,          
petit ni pro, ni tan ni qant,          
ni mal ni be, ni re ni qei.            

V.
Tant la sei coinda e prezan,           
e·l faigz de leis es tant eslitz,      
qe sai me tenc per enreqitz,           
e lai [serai en] son coman
la nueg e·l jorn e·l mes e l’an,      
c’aissi soi sieus con esser dei.      

VI.
Plas es lo vers, vauc l’afinan        
ses mot vila, fals, apostitz;         
et es totz enaissi noiritz           
c’ap motz politz lo vau uzan;          
e tot ades va·s meilluran            
s’es qi be·l chant ni be·l desplei.