I.
Bele Emmelos es pres desouz l'arbroie
pleure Guion sor l'erbe qui verdoie
por mal mari, qui la bat et laidoie;
maiz por destrainte de chastoi
ne puet son cuer retraire a soi,
et Guis aime Emmelot de foi.
II.
Forment se plaint la bele et mout s'esfroie
et dit plorant: - amis, trop me guerroie
por vostre amor mes maris et maistroie,
si c'onques mes fille de roi
ne fu menee a tel desroi. -
Et Guis aime Emmelot de foi.
III.
- Lasse, ou fuirai, quel sentier ne quel voie?
n'ai desirrier, amis, fors que vous voie;
car s'un seul jor a mon bon vos avoie,
tant ameroie le dosnoi
que jamaiz n'averoie anoi. -
Et Guis aime Emmelot de foi.
IV.
Li suens maris l'entent; mout se gramoie
de la bele, qui si le contraloie.
A li s'en vint; per mi le dras de soie
la bati tant que por un poi
ne l'a morte les le rapoi.
Et Guis aime Emmelot de foi.
V.
Tant li debat sa char qu'ele persoie,
si qu'en cent leus li desront et peçoie.
Aprés les colz son douz ami rechoie,
qui s'en repairoit del tornoi
par aventure les l'aunoi.
Et Guis aime Emmelot de foi.
VI.
S'amie entent li cuens, vers li s'avoie;
sa dolor voit, a pou qu'il ne marvoie.
- Bele Emmelot, - fait il, - Deus vos porvoie!
Dites moi, bele, je vos proi,
s'on vos a batue por moi? -
Et Guis aime Emmelot de foi.
VII.
Bele Emmelos, qui sospirant larmoie,
li dit: - amis, por vos les maus amoie,
que me faisoit li dux, quant vos nomoie,
et dit de vos amer n'ai loi;
or me sormainne a estreloi. -
Et Guis aime Emmelot de foi.
VIII.
Quant li quens l'ot, durement li anoie;
l'espee trait, dont li aciers burnoie.
Le duch a mort, durement s'i manoie;
s'amie emporte sanz effroi
devant lui sor son palefroi.
Et Guis aime Emmelot de foi.
IX.
En son païs porte li cuens sa proie;
sa dame en fait, a li servir s'otroie.
Et la bele n'a talent que recroie
de lui servir en bone foi;
Mout s'entraiment de cuer andoi.
Et Guis aime Emmelot de foi.