I.
Bele Yolanz en ses chambres seoit,
d'un boen samiz une robe cosoit,
a son ami tramettre la voloit.
En sospirant ceste chanson chantoit:
- Dex, tant est douz li nons d'amors,
ja n'en cuidai sentir dolors.
II.
Bels douz amis, or vos voil envoïer
une robe par mont grant amistié.
por deu vos pri, de moi aiez pitié. -
Ne pot ester, a la terre s'assiet.
Dex, tant est douz li nons d'amors,
[ja n'en cuidai sentir dolors.]
III.
A ces paroles et a ceste raison
li siens amis entra en la maison.
cele lo vit, si bassa lo menton,
ne pot parler, ne li dist o ne non.
Dex, tant est douz li nons d'amors,
[ja n'en cuidai sentir dolors.]
IV.
- Ma douce dame, mis m'avez en obli. -
cele l'entent, se li geta un ris,
en sospirant ses bels braz li tendi;
tant doucement a acoler l'a pris.
Dex, tant est douz li nons d'amors,
[ja n'en cuidai sentir dolors.]
V.
- Bels douz amis, ne vos sai losengier,
mais de fin cuer vos aim et senz trechier,
qant vos plaira, si me porrez baisier,
entre vos braz me voil aler couchier.
Dex, tant est douz li nons d'amors,
[ja n'en cuidai sentir dolors. - ]
VI.
Li siens amis entre ses braz la prent,
en un biau lit s'asient seulement:
bele Yolanz lo baise estroitement,
a tor françois en mi lo lit l'estent.
Dex, tant est douz li nons d'amors,
ja n'en cuidai sentir dolors.