| I. |
| Q vant ie voj pluz felons rire. (et) envoisier (et) chanter. (et) voj ke chascuns sospire. fausement por miex giller. lors me fait desconforter amors ki mes maus empire. (et) ma done tel martire ki sans morir me fait doloir. Amors font de moj lor voloir. jendur les maus por ioie auoir |
| Quant je voi pluz felons rire et envoisier et chanter, et voi ke chascuns sospire fausement por miex giller, lors me fait desconforter Amors, ki mes maus empire, et m'a doné tel martire ki sans morir me fait doloir. Amors font de moi lor voloir, j'endur les maus por joie avoir. |
| II. |
| Molt par est cruex li sire. com sert de cuer sans fauser. ki se coroce (et) aire. q(ua)nt il doit guerredoner. mais .c. tans fait ablasmer. ma dame ou mes cuers se mire. la meudre com puist eslire. la miex vaillans des millors Se ie laim ne men blasmes mie mes fins cuers ne pense aillors. |
| Molt par est cruex li sire, c'om sert de cuer sans fauser, ki se coroce et aïre quant il doit guerredoner; mais .c. tans fait ablasmer ma dame, ou mes cuers se mire, la meudre c'om puist eslire, la miex vaillans des millors. Se je l'aim ne m'en blasmés mie, mes fins cuers ne pense aillors. |
| III. |
| Tant redoc son escondire (et) son orgellex parler. q(ua)nt la voj si nos riens dire plain- dre ne merchi crier. si me soulas em penser. car aillors mes cuers ne tire. si cant q(ua)nt plus la remire. ie men lo (et) si men duel. Encor soient chi mj oel sest mes cuers la ou ie voil. |
| Tant redoc son escondire et son orgellex parler quant la voi si n'os riens dire, plaindre, ne merchi crier; si me soulas em penser, car aillors mes cuers ne tire, si cant quant plus la remire: je m'en lo et si men duel. Encor soient chi mi oel, s'est mes cuers la ou je voil. |
| IV. |
| Molt est amors fiere (et) dure a cex ki font son talant. (et) mains itroue mesure. cil ki la sert boinement. amors plus ne vos demanc de tos vos biens fors droiture (et) ke ne me puissent nuire faus (et) felon ki mont mort Jai tout p(er)du por loiaument amer non q(ue)s nen euc ne soulas ne deport |
| Molt est Amors fiere et dure a cex ki font son talant, et mains i trove mesure cil ki la sert boinement. Amors, plus ne vos demanc de tos vos biens, fors droiture, et ke ne me puissent nuire faus et felon ki m'ont mort. J'ai tout perdu por loiaument amer, n'onques n'en euc ne soulas ne deport. |
| V. |
| Vns dous espoirs ma seure ki me resioist souent. kainc tant belle creature nama nus en son vivant. riens ne faut en son cors gant. ne en sa simple figure. fors ta(n)t ke de moj na cure. dont ie morraj den vie Aler mestuet el douc pais ou ie morraj den vie |
| Uns dous espoirs m'aseüre, ki me resjoist sovent: k'ainc tant belle creature n'ama nus en son vivant; riens ne faut en son cors gant ne en sa simple figure, fors tant ke de moi n'a cure, dont je morrai d'envie. Aler m'estuet el douc païs ou je morrai d'envie. |