I.
Quant l’aura doussa s’amarzis
e·l fuelha chai de sus verjan
e l’auzelh chanjan lor latis,
et ieu de chai sospir e chan
d’Amor que·m te lassat e pres,
que eu anc non l’aic en poder.
II.
Las! qu’ieu d’Amor non ai conquis
mas can lo trebalh e l’afan,
ni res tan greu no·s convertis
cum so que om vai deziran;
ni tal enveja non fai res
cum so que om non pot aver.
III.
Per una joia m’esbaudis,
fina, qu’anc re non amiey tan;
quan suy ab lieys si m’esbahis
qu’ieu no·ill sai dire mon talan,
e quan m’en vauc, vejaire m’es
que tot perda·l sen e·l saber.
IV.
Tota la gensor que anc hom vis,
encontra lieys non pretz un guan;
quan totz lo segles brunezis,
de lai on ylh es si resplan.
Dieus me respieyt tro qu’ieu l’ades
o qu’ieu la vej’ anar jaser.
V.
Totz trassalh e bran e fremis
per s’amor, durmen e velhan.
Tan paor ai qu’ieu mesfalhis,
no m’aus pessar cum l’ademan,
mas servir l’ai dos ans o tres,
e pueys ben leu sabra·n lo ver.
VI.
Ni muer ni viu ni no guaris,
ni mal no·m sent e si l’ai gran,
quar de s’amor no suy devis,
non sai si l’aurai ni quan,
qu’en lieys es tota la merces
que·m pot sorzer o dechazer.
VII.
Bel m’es quant ilh m’enfolhetis
e·m fai muzar e·n vauc badan;
de leis m’es bel si m’escarnis
o·m torn dereire o enan,
c’aprob lo mal m’en venra bes,
ben leu, s’a lieys ven a plazer.
VIII.
S’ella no·m vol, volgra moris
lo dia que·m pres a coman;
ai, las! tan suavet m’aucis,
quan de s’amor me fetz semblan,
que tornat m’a en tal deves
que nuill’autra non vuelh vezer.
IX.
Totz cossiros, m’en esjauzis
car s’ieu la dopti e la blan,
per lieys serai o fals o fis,
o drechuriers o ples d’enjan,
o totz vilas o totz cortes,
o trebalhos o de lezer.
X.
Mas, cui que plass’ o cui que pes,
elha·m pot, si·s vol, retener.
XI.
Cercamons ditz: “Greu er cortes
hom que d’amor se desesper."