I.
Je chantaisse volentiers liement,
se je trovaisse en mon cuer l'ochoison,
maiz je ne puis dire, se je ne ment,
qu'aie d'amours nule rienz se mal non;
pour ce n'en puis fere lie chanson
qu'amours le me desenseigne,
qui veut que j'aim et ne veut que j'ataigne;
einsint me tient amours en desespoir,
que ne m'ocit ne ne lait joie avoir.
II.
Je ne doi pas amours grant mal voloir
s'a la pluz bele de cest mont mon cuer rent,
c'onques biautez ne fist si son pooir
d'estre en nului tres esmereement
con ele a fet en son tres biau cors gent;
ne rienz qu'a grant biauté taigne
ne voi qu'en li n'en sa façon soufraigne,
fors q'un petit li messiet, ce m'est vis,
ce que trop tient ses iex de moi eschiz.
III.
Quant je reguart son debonaire vis
et je la proi sanz bel respons avoir,
n'est merveille s'en l'esguart m'esbahiz,
quant g'i connoiz ma mort et sai de voir.
Puiz que mercis ne m'i deigne valoir,
ne sai u nul confort preigne,
quar ses orgueus m'ocit et li mahaigne.
Hé, franche rienz crueux, tant mar vous vi,
quant pour ma mort nasquistes sanz merci!
IV.
Que ferai, Dex, partirai me de li,
ainz que s'amours me par ait tout ocis?
naie, certes! il ne puet estre einsi,
qu'amours me tient et m'a volentez priz,
qui a mon cuer en li pour morir mis;
ne jamaiz tant ne mespraigne
que sanz merci u sanz mort en revaigne!
qu'assez aim mieuz morir en douz desir
que vivre iriez et ma vie haïr.
V.
Puiz que mes cuers ne s'en veut revenir
de vous, dame, pour cui il m'a guerpi,
aumosne avriez, se1 voliez retenir,
car s'il revient, a moi a il failli.
Pour vostre honour et pour Dieu vous en pri
que de moi pitiez vous praigne,
qu'il n'afiert pas a vous que rienz s'en plaigne
qu'el mont n'a, voir, si cruel trahison
con bel sanblant et corage felon.
VI.
Dame, conment qu'il m'en praigne,
merci amours de ce qu'ele m'adaigne
et tieigne a suen, ne ja de sa prison
ne quier issir, se mors u amez non.