| Jaufre rudel de blaya. | Jaufre Rudel de Blaya. |
| I | |
| Q uan lo rossinhol el follos. dona damor enquier en pren. e mou son chant iauze(n)t ioyos. e remira sa par souen. el riu son clar el prat son gen. pel nouel deport quey renha. mi uai grans ioys al cor iazer. |
Quan lo rossinhol el follos dona d'amor e·n quier e·n pren, e mou son chant iauzent joyos e remira sa par soven, e·l riu son clar e·l prat son gen, pel novel deport que·y renha mi vai grans joys al cor jazer. |
| II | |
| D una mistat suy enueyos. quar no sai ioya plus ualen. que da- questa que bonam fos. sim fazia damor prezen. quel cors a gras delgat e gen. e ses ren quey des- couenha. es amors bonab bon saber. |
D'un'amistat suy enveyos, quar no sai joya plus valen que d'aquesta, que bona·m fos si·m fazia d'amor prezen: que·l cors a gras, delgat e gen e ses ren que·y descovenha; es amors bon'ab bon saber. |
| III | |
| D aquesta mor suy cos- siros. uellan e pueys sompnhan dormen. quar lai ay ioy meraue- los per quieu la iau iauzens ioy- os. mas sa beutat nom ual nien. quar nulhs amicx nom essenha. cum ieu ia naya bon saber. |
D'aquest'amor suy cossiros vellan e pueys sompnhan dormen: quar lai ay joy meravelos, per qu'ieu la jau jauzens joyos. Mas sa beutat no·m val nien, quar nulhs amicx no·m essenha cum ieu ja n'aya bon saber. |
| IV | |
| D a questa mor suy tan cochos. que quant ieu uau ues lieys corren. uejaire mes qua reuer- sos. men torn e que lays nan fu- gen. e mos cauals uai ai tan len. a greu cug mais quey atenha. silha nos uol aretener. |
D'aquest'amor suy tan cochos que quant ieu vau ves lieys corren vejaire m'es qu'a reversos m'en torn e que lays n'an fugen. E mos cavals vai aitan len, a greu cug mais que y atenha s'ilha no·s vol aretener. |
| V | |
| A mors alegres part de uos. p(er)- so quar uau mo mielhs queren. e fuy entant auenturos. quen queras nay mon cor iauzen. mas pero per mon bon guiren. quem uol em apellem denha. mes ops aparcer mon uoleR. |
Amors, alegres part de vos per so quar vau mo mielhs queren; e fuy entant aventuros qu'enqueras n'ay mon cor jauzen: mas pero per mon Bon Guiren, que·m vol e m'apell'e·m denha, m'es ops a parcer mon voler. |
| VI | |
| E qui sai rema deleytos. e dieu non siec en bethleem. no sai cum iamais sia pros. ni cum uenha guerimen. quieu sai e cre mon escien. que selh qui ihesus ense- nha. seguraescola pot teneR. |
E qui sai rema deleytos e Dieu non siec en Bethleem, no sai cum ja mais sia pros ni cum venh'a guerimen; qu'ieu sai e cre, mon escien que selh qui Jhesus ensenha segura escola pot tener. |