 |
Bernard deuentadorn. AB ioi mou louers el come(n)z. E ab ioi re man e fenis. E sol que bona fos la fins. Bosteing qes lo comenzamen. Per la bona comensansa. Mi uien ioi e allegransa. E perço dei la bona fin grazir. Qar toz bon faiz uei lauzar al fenir. SI mapodera iois em uenz. Qem mi meraueilh co(m) eu so fris. Qar non dic e non es bruis. Per qe son tan gai ni iausenz. Mas greu ueires fis amanza. Ses paor e ses dottança. Qades ten hom ues ço cama faillir. Per qeu non maus de parlar en ardir. DUna ren mauonda mon senz. Qanc nul hom mon ioi non enqis. Qeu uolentier no lem mentis. Qe non par bon en sengnam(en)z. Anz follia et en fansa. |
 |
Qi damor abe nenança. Si ia lo uol ad ome descobrir. Si no lem pot ualere seruir. NOn es en nois ni fallim(en)z. Ni uilania ço mes uis. Mais dome qan se fai deuis. Dautrui amor e conosce(n)z. Ennoios e qeus ena(n)za. Sim fai ennoi ni pesança. Chascun se uol de son mestier fornir. Mi confondez e uoi non uei iauzir. BEn conuen a domna ardimenz. Entrauols gens e mal uezis. Qe si bon cors no la fortis. Greu pot esser pros ni ualenz. Per qeu prec naia menbranza. La bella en cui ai fianza. Qe nos cange per paraula nis uir. Qels enemics faz denueia morir. BOna donnal uostre cor genz. El bel oil man conquis. Li bel semblant e li dols ris. E la bella bocca rienz. Qan ben men pren aesmanza. De beutat no sai engansa. La genser qe hom anc pogues chausir. On non uei clar dels oils ab qeus remir. ANc bella bocca rienz. Non cuidei baisand metrais. Qab un sol dolz baisar maucis. Si ab autres non mes guirenz. |
 |
Eissament mes per semblança. Cum de peleus la lança. Qe del seu colp non podiom garir. Sunaltrauez non se(n) fezes ferir. BEl uezer se nes dottanza. Uei qel uostre prez en nanza. Qe tant sabez de saber far e dir. Nul hom nos pot de uos amar suffrir. |