| I 7 II. 14 III. 21 IV. 28 V. 35 VI. 42 VII. 45 |
Colins Musès, je me plaing d'une amor ke longuement ai servie de loial cuer, n'ains pitié .... n'i poi trover nen aïe, s'i truis je moult semblanz de grant douçor, mais ce m'est vis ke il sont traïtor, ke bouche et cuers ne s'i acordent mie. Jakes d'Amiens, laissiés ceste folor! Fuiés fausse druerie, n'en biau semblant ne vos fiés nul jor: Cil est musars ki s'i fie! Puis ke trovés son cuer a menteor, se plus l'amés, sovant duel et irour en averés et pis ke je ne die. Colin Muset, ne m'iert pas deshonor, se de li fais departie. Puis c'ai trové son samblant tricheor, porchacerai moi d'amie, car je li ai veü faire tel tour et tel samblant et tel ensaigne aillors, par coi je haz li et sa compaignie. Jakes d'Amiens, il n'est duels ne irour fors ki vient de jalousie. Povres amans souffre mainte dolor ki bee a grant signorie, et un usage a borjoise tous jors: ja n'amera, tant soit de grant richour, home, s'il n'a la borse bien garnie. Colins Musès, gentils dame ait honor, ki a ceu ne bee mie, mais la ou voit sen, prouesce et valour, joliveté, cortoisie! La fausse lais pour ceu, si m'en retour a la belle, la blonde et la meillor ki onkes fust d'amors nul jor proïe. Jakes d'Amiens, et j'errant m'en retour as chapons en jance aillie et as gastiaus ki sont blanc come flor et au tres bon vin sor lie. As bons morsels ai donee m'amor et as grans feus parmi ceste froidour: faites ensi, si menrés bone vie. Colin Muset, kier t'aise et ton sejor, et je querrai d'amors joie et baudor, car consirer d'amors ne me puis mie |