| I. 7 II. 14 III. 21 IV. 28 V. 35 VI. 42 VII. 45 |
Colins Musés, je me plaing d'une amor que longuement ai servie de loial cuer, n'ains pitié ne restor n'i poi trover nen aïe; si truis-je molt semblans de grant douçor, mais ce m'est vis que il sont traïtor, que bouche et cuers ne s'i acordent mie. Jaques d'Amiens, laissiés ceste folor! Fuiés fausse druerie, n'en bel semblant ne vos fiés nul jor: cil est musars qui s'i fie! Puis que trovés son cuer a mentëor se plus l'amés, sovent duel et iror en averés, et plus que je ne die. Colins Musés, ne m'iert pas deshonor se de li fais departie: puis qu'ai trové son semblant trichëor, porchacerai moi d'amie; car je li ai vëu faire tel tor, et tel semblant et tel enseigne aillors: par quoi je hais li et sa compagnie. Jaques d'Amiens, il n'est duels ne iror fors que vient de jalousie. Povres amans suffre mainte dolor qui bée a grant seignorie, et un usage ont borjoises tos jors: ja n'ameroit, tant soit de grant richor, homme, s'il n'a la borse bien garnie. Colins Musés, gentils dame ait honor qui a ce ne bée mie, mais la ou voi sen, proesce et valor, joliveté, cortoisie. La fausse lais: por ce je m'en retor a la bele, la blonde et la meillor qui onques fust d0amors nul jor proiie. Jaques d'Amiens, et j'errant m'en retor aux chapons en jancellie, et aux gastels qui sont blanc comme flor, et a trés bon vin sor lie! Aus bons morcels ai donée m'amor et aus grans feus par mi ceste froidor: faites ensi si menrés bone vie! Colins Musés, quier t'aise et ton sejor et je querrai d'amors joie et baudor: car consirer d'Amors ne me puis mie! |