| I. 9 II. 18 III. 27 IV. 36 V. 45 |
Sire cuens, j'ai vielé devant vos, en vostre ostel, si ne m'avés riens doné Ne mes gages aquités: C'est vilanie! Foi que doi sainte Marie, ensi ne vos sievrai mie: m'aumosniere est mal garnie, et ma borse mal farsie. Sire cuens, car commandés de moi vostre volenté: Sire, s'il vos vient a gré, un bel don car me donés par cortoisie! Talent ai, n'en dotés mie, de raler a ma mesnie: quant vois borse desgarnie, ma fame ne me rit mie. Ains me dit: "Sire engelé, en quel terre avés esté, .......................................... Qui n'avés riens conquesté A val la vile? Vés com vostre male plie! Elle est bien de vent farsie! Honis soit qui a envie d'estre en vostre compaignie! Quant je vieng a mon ostel et ma fame a regardé derrier moi le sac enflé, et je, qui sui bien paré de robe grise, sachiés qu'ele a tost jus mise la quenoille sans faintise: elle me rit par franchise, ses deus bras au col me plie. Ma fame va destrosser ma male sans demorer; mes garçon va avubrer mon cheval et conreer; ma pucele va tuer deus chapons por deporter a la janse aillie. Ma fille m'aporte un pigne en sa main par cortoisie. Lors sui de mon ostel sire a molt grant joie sans ire plus que nuls ne porroit dire. |