| |
Por la meillor c'onques formast Nature
chant en espoir d'avoir alegement.
onc Deus ne fist si bele criature,
toute ualor en li croist et reprent;
ce me semont de chanter liement:
que tant la sai bele et vaillant et sage.
si voirement con l'aim de fin corage,
soient par li alegie mi torment.
Mes ensi est que resons et droiture
dient que i'ai esploitie folement
en ce que i ai trop haut mise ma cure,
mes ce qu'amors me coumande et aprent
ne porroie refuser sans outrage:
qui bien la sert ment en vaut son aage,
por ce fet bon devenir de sa gent.
Por ce la serf nus hons ne se doit faindre
d'amors seruir car tos biens uient de li:
ma ioie puet esforcier et estaindre
si doucement c'onques ne le senti;
enbla mon cuer et madame en sesi,
qui bien me puet alegier ma grevance,
et s'il li plest que muire en atendance
si laim ie tant qu'il me plest bien ausi.
Quant plus me voi guerroier et destraindre
da maus d'amors qui ne m'ont pas guerpi,
meus aim et plus est la pensee graindre,
dont ie vos serf, dame, sachies de fi;
si m'a vers vos fine Amors enhardi,
douce dame, ne l'aies en viltance,
cuer bien apris herbergies en vaillance,
ne m'ocies ie ne l'ai deserui!
Mon cuer aves, tres bone dame chiere,
puis qu'amors l'a mis en vestre dangier;
ie ne l'en doi partir ne trere arriere:
meus aim morir que le voie elloignier,
car uns espoirs me dit et fet cuidier
c'oncor aurai recouvrier a la ioie
la ou par droit auenir ne porroie.
Or mi puist Deus et fine Amor aidierC.
Chancon, va t'en, penses delesploitier
droit au Vaugon Guion et si li proie
qu'il soit amans, que sen Amor s'otroie,
meus en vaudra por s'onor essaucier. |
