| I | |
|---|---|
| Il m'est avis que nus ne puet chanter de jolif cuer s'Amors ne li consent, qui m'a doné vouloir de bien amer; si l'en merci de cest iolif present, car mult m'en truis amendé: cuer qui ne veut tous dis en loiauté fine Amour servir, ne veut en li vaillance retenir. |
|
| II | |
| S' Amors m'a fet aucun mal endurer, g'espoir qu'encor avrai alegement et s'Amour veut que sans guerredoner serve tous dis, ie le veil ensement. Fins amans doi prendre en gré ce qu'Amors fet. S'ensi m'est destiné, que doie morir pour ceste amour, ie le vueil bien souffrir. |
|
| III | |
| Ie sai de voir qu'Amors me fet penser en trop haut lieu, mes ie ne sai coument on puist par droit son coumant refuser. Quant li plera mi plus cruel tourment ierent a ioie torné, s'ai bon espoir, ie sai de verité, qu'Amors puet merir plus de tous biens qu'on ne puet deservir. |
|
| IV | |
| Si me dont Deus a ioie recouvrer, i'ai ma dame servie loiaument et servirai; ne porroie oublier son dous senblant, son bel acointement. Quant ie remir sa biauté, dont iai le cuer d'amors si enbrasé de tres grant desir, qu'a paine puis mes eux de li partir. |
|
| V | |
| Meilleur de li ne porroit nus trouver: pour Dieu Amors, car li donés talent de moi aidier sans li deshenorer! S'un biau senblant mi fesoit seulement, ele m'auroit conforté de grant ioie. Dex li doint volenté de mon chant oir, a li ne m'os autrement descouvrir. |
|