I.
Quant vient en mai, que l'on dit as lons jors,
que Franc de France repairent de roi cort,
Reynauz repaire devant el premier front;
si s'en passa lez lo meis Arembor,
ainz n'en dengna le chief drecier a mont.
E Raynaut amis!
II.
Bele Erembors a la fenestre au jor
sor ses genolz tient paile de color;
voit Frans de France qui repairent de cort,
et voit Raynaut devant el premier front;
en haut parole, si a dit sa raison:
e Raynaut amis!
III.
- Amis Raynaut, j'ai veu cel jor,
sa passisoiz selon mon pere tor,
dolanz fussiez se ne parlasse a vos. -
- Ja·l mesfaites, fille d'empereor,
autrui amastes, si obliastes nos. -
E Raynaut amis!
IV.
Sire Raynaut, je m'en escondirai;
a cent puceles, sor sainz, vos jurerai,
a .xxx. dames que avuec moi menrai,
c'onques nul home fors vostre cors n'amai.
Prennez l'emmende et je vos baiserai. -
E Raynaut amis!
V.
Li cuens Raynauz en monta lo degré,
gros par espaules, greles par lo baudré,
blonde ot lo poil, menu, recercelé;
en nule terre n'ot si biau bacheler.
Voit l'Erembors, si comence a plorer.
E Raynaut amis!
VI.
Li cuens Raynauz est montez en la tor,
si s'est assis en .i. lit point a flors,
dejoste lui se siet bele Erembors.
Lors recomencent lor premieres amors.
e Raynaut amis!