I.
En pessamen mi fai estar Amors
En pessamen mi fai estar Amors
cum pogues far una gaia chansso
per la bella a cui m'autrei e·m do,
qe·m fetz chausir mest totas las genssors,
e vol q'ieu l'am leialmen ses engan,
ab verai cor et ab tota ma cura;
si fatz ieu si c'ades creis e meillura
l'amors qe·il port e·m doblon miei talan.
II.
Gen m'a saubut garir de las dolors
qe·m fetz sofrir una longa sazo,
per tal qe jes non avia razo
qe·m fezes so per q'ie·m vires aillors:
ar, s'il a sen, pot ben anar pensan
q'en pauc d'ora si camja l'aventura.
Mal fai qui·l sieu mena a desmesura,
qe jes pois tant l'autre no l'amaran.
III.
Q'ieu ai auzit, a vos o dic, seignors,
d'un poderos emperador que fo
per cui eront malmenat siei baro,
don sos orguoills baisset e sa vigors;
e per so prec pro dompna benestan
qe son amic no men outra dreitura,
q'en totas res fai bon gardar mesura,
e pent s'om tart pois qe a pres lo dan.
IV.
Bella dompna, meiller de las meillors,
coinda e plazens de cors e de faisso,
Amors mi ten en sa doussa preiso:
per vos o dic, qe pros m'er et honors
si ja fos mais qe Dieus m'espires tan
qe·m volcsetz far de vostres bratz centura;
en tot aitant qan ten lo mon ni dura
non es mais res q'ieu desir aver tan.
V.
E puois tant val, dompna, vostra valors
q'el mon non vei tant bella ni tant pro,
ja non voillatz q'ie·us serva en perdo;
cum maiers es d'ome sa grans ricors
mieills deu gardar a cels que servit l'an:
c'aisso, sapchatz, mou de gentil natura
c'om renda·l mal segon la forfaitura
e ben per ben; dompna, als no·us deman.
VI.
Las! mil n'ai faitz entre sospirs e plors,
tal paor ai que ja no·y aia pro,
qan pens cum es de gentil naissio,
e cum vos etz de totas rais e flors,
e cum vos sai coingda, bella e prezan,
e cum vos etz fina, leials e pura,
e cum chascus autreia e pliu e jura
qe non avetz el mon par ni semblan.
VII.
Dompna, merce vailla·m vostra valors:
ja non gardetz a vostre pretz tant gran,
mas cum vos ai voluntat fina e pura,
e cum mos cors s'aficha e s'atura
a vos servir, que d'als non ai talan.