I
1 Mout me plaisent a sentir
li joli tourment
dont Amours me fait languir
savereusement
5 pour la bele a qui me rent
ligement.
Siens sui sans ja departir;
si con je l'aim m'en doint Amours joïr.
5. qui] cui Z 7. Sien sui] Sui siens Z
II
Trop mieus vauroie morir
10 que le bon talent
d'amours m'esteust guerpir.
Je ne voi coument
nus ait joie s'il n'enprent
hardement
15 de loial Amour servir:
pour che m'i tieng, que boin s'i fait tenir.
III
Cascuns se doit enhardir
d'amer loiaument
et endurer et soufrir
20 debonairement
quanques boine Amours consent,
car plus rent
ke ne sacent deservir
cil ki de cuer otroient son plaisir.
IV
25 Dame qui le cuer avés
dont ja fui saisis,
proi vous que ce soit vos grés
k'Amours l'ait assis
en vous: ja n'en ert vos pris
30 amenris
et se g'i sui oublié,
bien vous en soit li mesfais pardounés.
V
Coument que soie menés,
dame de haut pris,
35 ja n'ert de moi desevrés
li pensers jolis
que j'ai d'estre fins amis,
car toudis
ert amours et loiautés
40 en moi, coument que de vous soiies amés.