I.
Quant li dous estez decline,
Que voi faillir foille et flor,
Et li tans se deslumine,
Que n'apert point de verdor,
Adonc souspir d'Amor fine
Por une que j'en aor;
Dex, verrai je ja le jor
Qu'ele un si douz mot me die
Par coi je viegne à s'Amor?
II.
Mout me mostre grant haïne
Cele qui j'aim par Amor;
Moi samble que j'adevine
Si com cil qui a paor
D'une qui n'est pas frarine,
A cui je pens nuit et jor.
Hélas, j'en trai grant dolor
Si com cil qui merci crie;
Morir cuit sanz nul retor.
III.
Trop m'est ceste Amor grevaine
S'encor n'a de moi merci
Cele qui si me demaine:
Tot mi pensé sunt à li;
Mout seroit salve ma paine
S'il li sovenoit de mi.
Trop me tendroie a failli
Se par mon forfait perdoie
Ce que lonc tans ai servi.
IV.
Se la bele m'est lontaine,
Et mes cors n'est pres de li
S'Amors m'est au cuer prochaine
Assez plus que je ne di.
Dame de grant biauté plaine,
Car secorez vostre ami
D'autel cuer com je vos pri:
Adont auroie ma joie
Et mon voloir acompli.
V.
Douce dame debonaire,
En la fin de ma chançon
Me membre de vo viaire
Et de vo clere façon.
trestoz li cuers m'en esclaire
Quant j'oi nomer vostre non;
Adonc sui en tel prison
Que toz les jors de ma vie
Vos faiz je de m'Amor don.