Revisione di Edizione del Dom, 29/04/2018 - 12:21

Testo: R. Viel¹

Daufin, ie·us voill derainier vos, e le conte Guion, qe ain[c] en ceste saison vos feistes bon gerrier e vos iurastes ou moi; e portastes me tiel foi cum N’ Aëngris a Rainart, cui senbléz dou poil liart. Vos me laissastes aidier por cremor de guïerdon e car savetz q’a Chinon non a argen ni denier: e vos voletz riche roi, bon d’armes, qui vos port foi; e ie sui chiche coart, si·us virétz de l’autre part! Encor vos voill demandier d’Ussoire, si·l vos seit bon, ni si·n prodrés vengeison, ni loaréz soudadier! Mas una ren vos outroi, si be·m fausastes la loi: bon gerrier a l’estendart trouvarétz le roi Richart! Je vos vi, au comenssier, large de gran messïon; mes puis trovéz ocheison qe, por forz chasteuz levier, laissastes don e dompnoi, e corz, e segre tornoi; mes no·s chaut avoir regart que François son Longouart! Va sirventés, ie t’envoi en Alvernge, e di moi as dos contes de ma part: s’uimeis font pais, Dies los gart. Que chaut si garz ment sa foi, q’escüérs n’a point de lui! Mes, de soi avan, se gart, que n’aït en peior sa part.