I.
Joie ne guerredons d'Amors
Ne vienent pas par bel servir,
Car on voit sovent ceus faillir
Qui servent sans changier aillors:
Si m'en aïr
Quant celi serf sanz repentir
Qui ne me veut faire secors.
II.
Voirs est qu'Amors est granz douçors
Quant dui cuer sunt un sanz partir,
Maiz Amors fait l'un sol languir
Et les anuis sentir toz jors:
Bien os gehir
Que ne puis à Amors venir
Et en li gist toz mes retors.
III.
Li haut pris et la granz valors
de la bele que tant desir,
Sa biautez qu'en mon cuer remir,
Ses clers vis, sa fresche colors
Me font chierir
Ma mort bonement et soufrir
Les maus d'amer et les dolors.
IV.
Ha bele, des nompers la flors,
Ne faites vostre pris mentir
Par trop merci contretenir;
C'ains que vos viegne deshonors
Vueill melz morir:
Si n'aura en vos qu'aconplir
Ne rienz ne feroiz à rebors.
V.
Ja n'iert perie ma labors
Se fins cuers doit d'Amors joïr;
Mais je criem par trop haut choisir
Ne soit mes guerredons trop cors.
Par son plaisir
Li proi de merci acueillir:
Aumosne li iert et honors.