|
une remembrance ki me fait ratalenter. de chancon trouuer.
pour la bele cui iaour. ki sour toutes a biaute (et) ualour.
Si tost ke vi sa samblance sen tres bel uiaire cler. (et) sa bele
contenance ke tous li mons doit loer. conuint demourer. mo(n)
cuer a li sans retour. dont ien merci souuent loial amour.
Certes richement mauance boine amours au droit parler.
ke dame de tel uaillance. me fait seruir (et) amer. (et) li bel penser. ki
men uienent nuit (et) iour. me font sentir mal de douce sauour.
Ma dame aim en tel doutance. ka li ne mos dolouser. de lamoureu
se greuance. ki souuent me fait plourer (et) ioie mener. de ma
mesestance plour. (et) chant de che ke iaim sans folour. A
mours si com iai uoellance de ma dame foi porter. uoellies uous
par ma poissance ke pour moi reconforter. me uoelle douner.
ioie sans sa deshounour. car ia nel quier auoir par autre tour.
|
