I.
Ab fina ioia comenssa              
lo vers qui bels motz assona       
e de re no·i a faillenssa;         
mas no m’es bon qe l’apreigna      
tals cui mos chans non coveigna,   
q’ieu non vuoill avols chantaire,  
cel que tot chan desfaissona,      
mon doutz sonet torn’ en bram.     

II.
D’amor ai la sovinenssa            
e·ls bels digz: ren plus no·m dona;
mas per bona atendenssa            
esper c’alcus iois m’en veigna;    
·l segles vol c’om si capteigna    
segon que pot sempres faire        
q’en breu temps plus asazona       
q’a pro d’aisso don ac fam.        

III.
Bel semblan n’ai en parvenssa,     
que gen m’acuoill e·m razona,      
mas del plus no·m fai cossenssa,   
ni·s taing que tant aut mi ceigna  
ni tant rics iois m’endeveigna     
on coven us emperaire:             
pro fai car sol gen mi sona,       
ni car sofre q’ieu la am.          

IV.
Mout mi fai granda temenssa,       
car tant pauc si abandona:         
iois q’enaissi trop bistenssa      
mout mostra mal entresseigna.      
Si cum li plaira mi teigna,        
que tant no·m fai gran mal traire. 
Sel so que no l’encaisona:         
tant no·m ten en greu liam.        

V.
Ses pechat fis penedenssa          
et es tortz qui no·m perdona,      
et ieu fatz long’entendenssa       
per tal perdon que no·m deigna;    
assatz cuig que mal m’en preigna,  
que perdutz es desperaire;         
per c’ai esperanssa bona:          
pel nostre don mi reclam.          

VI.
Ben es fis de gran valenssa        
mos cors, s’aqest m’abarona        
per cui totz pretz creis e genssa, 
e sap pauc qui so m’enseigna       
que ia nuill’autra·m sosteigna:    
tant bella filla de maire,         
ni tant cum cels plou ni trona     
non ac tal el ling d’Azam.         

VII.
Als comtes mand en Proenssa        
lo vers e sai a Narbona,           
lai on pren ioi mantenenssa,       
segond aqels per cui reigna;       
e ieu trob sai qi·m reteigna,      
tal dompna don sui amaire:         
non ies a la lei gascona;          
segon las nostras amam.            
 

I.
Abans que·l blanc pueg sion vert,
ni veiam flor en la sima,        
quan l’auzel son de chantar nec, 
q’us contra·l freg non s’esperta,
adoncs vuelh novelhs motz lassar 
d’un vers, qu’entendan li melhor,
que·l bes entre·ls bos creis e par. 

II.
Per so·m plai qu’en lo temps no vert
mostre·s vers de razon prima        
als valens, cui sabers cossec,      
quar esta gens mal aperta           
non sabon ren, que·is vol levar,    
que sens per nulh doctrinador       
ses bon cor no pot melhurar.        

III.
Dins es poirida e sembla vert       
un’avols gens, que blastima         
tot so qu’anc dreitura amec;        
e pus negus no s’acerta;            
Dieus, quant pot hon en els blasmar,
qu’anc no·i agron l’artelh menor    
manht home, a cui augh pretz dar.   

IV.
Nuls hom del mon non a pretz vert,  
quan vol daurar e pueys lima,       
per qu’es fols sel que·s n’auzec,   
pos ve que bes no·i reverta;        
qu’a la cocha pot hom proar         
amic de boca ses amor,              
mas don no ves, non esperar.        

V.
Qui anc vi fresc ioven ni vert,     
ar es mortz per gent cayma,         
que cuja far tot lo mon sec,        
qu’ieu non vey fol ni mamberta,     
q’us no fassa sofren son par;       
per so frutz torna en peior:        
dous semblan ab sabor d’amar.       

VI.
Ben sap far paisser herba vert      
femna, que·l marit encrima          
per son avol fag tener nec;         
d’aqui nays la gens dezerta         
de pretz, q’us no n’auza parlar     
mas: de mal frug mala sabor;        
e·lh filh no volon sordeiar.        

VII.
Aissi naisson sec e non vert,       
q’us d’enjan non repayma;           
ni anc, pos Dieus Adam formec,      
non tenc tant sa port’ uberta       
bauzia, qu’en fai manhs intrar;     
que lop son tornat li pastor,       
qui degron las fedas gardar.        

VIII.
Cobeeza a mort pretz vert,          
qu’ensenha·ls baros d’escrima;      
e cobezetatz s’abrazec,             
un’arsors, que es uberta,           
don vezem manht ric abrazar;        
pretz cuion traire d’aul labor,     
mas anc ses Dieu no vi pretz car.
 

I.
Al dessebrar del pais              
on m’avi’ amors conquis            
aprendetz, si no·us es fays,       
so don m’alegr’ e e m’irays        
on que·m vir;                      
mas tan cum suy ab gent conia      
no·m dey per ira marrir            
qu’on mays puesc apres non ponia.  

II.
Mas ves un’amor fuy fis            
tro qu’a lieys plac que·m giquis,  
e quar al sieu tort mi trays       
ben fazen e trop m’afrays          
ab ben dir,                        
quar de doussa terra conia         
mi trays e·m fetz dessalhir;       
mas, quan que tric, l’er vergonia. 

III.
Anc non aniey tans camis           
ves Francs ni ves Sarrazis,        
on mielhs fos demandatz iays       
ni plus amatz pretz verays         
ab servir                          
e·lh gens qu’ es cortez’ e conia,  
silh que·m veira·n tart venir,     
ta mal m’es qui m’en deslonia.     

IV.
Sel’amor, don fuy vezis,           
dont ara m’esfredezis,             
amer’ ieu plus que Roays;          
e si no·m fos per fols brays       
trassalhir                         
et a la mia doussa conia           
si m’eschazes a mentir,            
vos agratz d’aital messonia.       

V.
D’esser hueymais m’esbaudis        
pus amars m’enamarzis;             
qu’ara·m sent de totz assays       
vertz e blancs e brus e bays,      
e m’albir                          
e dic vos d’amor nems conia        
que paors es de perir              
lai on li es ops que lonia.        

VI.
Ar an ses cors, e·l fals ris       
tot ais si cum l’abelhis;          
qu’ieu mi gurp de lieys e·m lays   
e mi no veira iamays.              
A partir                           
m’ave de la terra conia:           
si no·m fos per que·s n’azir,      
mes mi for’ en la canonia.         

VII.
Senher N’Estrieu, qui s’aconia     
de trop human ioy iauzir,          
mal fau qui non lo calonia. 
 

I.
Amics Bernartz de Ventadorn,     
com vos podetz de chant sofrir,  
can aissi auzetz esbaudir        
lo rossinholet noih e jorn?      
Auyatz lo joi que demena!        
Tota noih chanta sotz la flor,   
melhs s’enten que vos en amor.   

II.
Peire, lo dormir e·l sojorn      
am mais que·l rossinhol auvir;   
ni ja tan no·m sabriatz dir      
que mais en la folia torn.       
Deu lau, fors sui de chadena,    
e vos e tuih l’autr’ amador      
etz remazut en la folor.         

III.
Bernartz, greu er pros ni cortes 
que ab amor no·s sap tener;      
ni ja tan no·us fara doler       
que mais no valha c’autre bes,   
car, si fai mal, pois abena.     
Greu a om gran be ses dolor;     
mas ades vens lo jois lo plor.   

IV.
Peire, si fos dos ans o tres     
lo segles faihz al meu plazer,   
de domnas vos dic eu lo ver:    
non foran mais preyadas ges,    
ans sostengran tan greu pena    
qu’elas nos feiran tan d’onor   
c’ans nos prejaran que nos lor. 

V.
Bernartz, so non es d’avinen    
que domnas preyon; ans cove     
c’om las prec e lor clam merce; 
et es plus fols, mon escien,    
que cel qui semn’ en l’arena,   
qui las blasma ni lor valor;    
e mou de mal ensenhador.        

VI.
Peire, mout ai lo cor dolen,    
can d’una faussa me sove,       
que m’a mort, e no sai per que, 
mas car l’amava finamen.        
Faih ai lonja carantena,        
e sai, si la fezes lonhor,      
ades la trobara pejor.          

VII.
Bernartz, foudatz vos amena,    
car aissi vos partetz d’amor,   
per cui a om pretz e valor.     

VIII.
Peire, qui ama, desena,         
car las trichairitz entre lor   
an tout joi e pretz e valor.    
 

 
I.
Assatz sai d'amor ben parlar, 
ad ops dels autres amadors;
mas al mieu pro, que m'es plus car,
non sai ren dire ni comtar;
qu'a mi non val bes ni lauzors
ni mals digz ni motz avars;
mas ar sui vas amor aitaus
fis e bos e francs e liaus
 
II.
per qu'ensenharai ad amar
los autres bos domneyadors;
e si'n crezon mon essenhar
far lor a d'amar conquistar
tot aitan cant volran de cors!
E si oguan pendutz o ars
qui no m'en creira, qar bon laus
n'auran selhs qu'en tenran las claus!
 
III.
Si voletz dompnas guazanhar,
quan querretz que·us fassan honors,
si·us fan avol respos avar 
vos las prenetz a menassar;
e si vos fan respos pejors 
datz lor del ponh per mieg sas nars;
e si son bravas siatz braus! 
Ab gran mal n'auretz gran repaus. 
 
IV.
Ancar vos vuelh mais ensenhar
ab que conquerretz las melhors:
ab mals digz et ab lag chantar
que fassatz tut, et ab vanar;
e que honretz las sordeyors.
Per lor anctas las levetz pars, 
e que guardetz vostres ostaus
que non semblon gleisas ni naus. 
 
V.
Ab aisso n'auretz pro, so·m par.
Mas ieu·m tenrai d'autras colors
per so quar no·m agrad'amar;
que ja mais no·m vuelh castiar,
que s'eron totas mas serors!
Per so lor serai fis e cars,
humils e simples e leyaus,
dous, amoros, fis e coraus. 
 
 

I.
Be m’es plazen           
e cossezen               
que om s’ayzina de chantar
ab motz alqus             
serratz e clus            
qu’om no·ls tem ja de vergonhar.

II.
D’aut chai em bas               
qui per compas                  
no sap lo segle demenar;        
e ben hi falh                   
qui tan trassalh                
que non hi puesc’ a temps tornar.

III.
Ben es auras                     
totz Crestias                    
que ia nems si vol encombrar,    
ni sobre·l cays                  
leva tal fays                    
que corren no·l puesca portar.   

IV.
Qu’ieu sai e sen                 
mon escien,                      
e vuelh vos en tot castiar,      
per trop captens                 
val hom mot mens                 
e ten hom plus vil son afar.     

V.
Mais am un ort                   
serrat e fort                    
qu’hom ren no m’en puesca emblar 
que cent parras                  
sus en puegz plas:               
qu’autre las tenh’ ez ieu las guar. 

VI.
Que·l reprochiers                   
es vertadiers                       
que dels antics auzi comtar:        
lo ric al ric,                      
e l’om mendic...:                   
quecx d’eis semblan troba son par.  

VII.
De tot can suelh                    
amar, me tuelh                      
e so qu’ei amat desampar,           
qu’ieu non am re                    
ni autre me                         
e cug me totz d’amor lonhar.        

VIII.
Qu’arreire temps                    
ai amat nemps                       
e vuelh m’en atrazach layssar;      
non aura grat                       
qui m’a amat                        
ni en cor m’avia d’amar.            

IX.
Qu’ieu ai un cor                    
et un demor                         
et un talan et un pessar            
et un amic                          
vas cui m’abric                     
et a cuy me vuelh autreyar.         

X.
Si mal m’en pren                    
per eys mon sen,                    
cug a ma vida follejar;             
apres ma mort                       
no·m fass’ om tort                  
d’aquo qu’ieu ai ad oblidar.        

XI.
Daus manhtas pars                   
me for’ afars                       
en prendre o en gazanhar;           
fers e parvenz                      
es mos talenz                       
vas m’amiga qu’eu tenc plus car.    

XII.
. . . . . . . . . . . . . . . . . . . . . . . . . .    
. . . . . . . . . . . . . . . . . . . . . .  . . .     
. . . . . . . . . . . . . . . . . . . . . . . . .      
amors de lonh,                                         
tan gran besonh                                        
qu’ai de tener e de balhar.                    
 

I.
Bel m’es, quan la roza floris 
e·l gens terminis s’enansa,   
faz’ un vers a ma ventura     
don mos cors es en balansa;   
pel dous chan del rossinhol,  
c’aug chantar la nueit escura 
per los verdiers e pels plais.

II.
Reis, per Christ iamais no·ns faillis
quar Masmutz nos faun sobransa: 
coms ni dux non senh sentura    
mieils de vos feira de lansa;   
per l’emperador me dol,         
c’a moutas gens fai fraitura:   
tals en plora que n’a iais.     

III.
Vostre coratges s’esclarzis,    
quar n’avetz bon’esperansa;     
sobre paguans, gen tafura,      
cavalguatz cenes duptansa;      
premiers prenretz Labadol,      
e si anatz a dreitura           
tro a Marroc, feiran lais.      

IV.
Sel que·l ioi del setgle delis  
vei que son pretz dezenansa;    
fils es d’avol criatura,        
que fai avol demonstransa:      
e per tan non baisa·l col;      
quar gitatz es a noncura,       
estai mais entre·ls savais.     

V.
Per mi non dic, tan m’abelis,   
quan vei molt gran alegransa:   
amors vol c’a longias dura.     
No pot hom aver fizansa,        
si·l carnal amar non vol;       
quar vei que cors non a cura    
mas de senhor que engrais.      

VI.
Chantador, lo vers vos fenis:   
aprendetz la comensansa.        
Marcabrus per gran dreitura     
trobet d’altretal semblansa,    
e tengon lo tug per fol,        
qui no conoissa natura          
e no·ill membre per que·s nais.
 

 
I.
Belh m'es dous chans per la faja
que fam l'auzelhet menut,
don refrimon li batut
per la beutat del frescum,
e quecs ab sa par s'asaja 
e chanton, per qu'ieu m'assai 
d'un vers faire, se noi pec.
 
II.
Quecs pes e pnha com aja
so que vol et a volgut;
volh e folh reconogut
fai del pe jusc'al rassum;
lui qu'a volontat qu'es gaja
viatz l'afolla e·l dechai
orgolhs que d'aut bas cazec.
 
III.
Et adoncs ira veraja
creis lui que s'apelha drut,
e selh que l'a fag cornut
a·l donat morsel querrum
que l'estrangle, ans que·l traja;
e mespresa l'en om sai
e lai non cal que jai pec.
 
IV.
Si ben de premier si taja
l'enemics, tot er saubut
quant fai far a rescondut, 
e volv dous en amarum,
don nais amistatz savaja,
que fai tornar un gen bai
de boca en agut bec. 
 
V.
Selh que mais a plus s'esmaja
e per tost recrezut
a l'aver qu'a conquezut,
dont elh mon a ren ma·l fum;
e·n sia iratz o·l plaja,
la menre pratz l'en eschai,
quar elh eis no·s n'apanec. 
 
VI.
Quan se volv aquesta raja,
mortz que fai de parlier mut, 
se·l bens a·l forfag vencut,
lonhada s'es del ferrum 
l'arma que del enferm braja, 
quar endreg lui mon s'en vai
lai ont ancse mal estec. 
 
VII.
Ges pueis de mal no s'esglaja, 
que·l mielhs de ben s'a tolgut,
quant a·l dreg semdier perdut;
ben es qui cel pel e plum
don a coita e sofraja;
qua folia peza mai
qui·ll balansa el dreg bavec.
 
VIII.
Lo vers vas la fin s'atraja
e·lh mot sion entendut 
per n'Isart, cui dieus aiut,
quez el ama en autum;
se i a mot que no s'eschaja, 
volh que l'en mova, si·l plai,
e que non li tenha nec.
 
IX.
Lo vescoms que gran ben aja 
vuelh que lo·m melhur, si·l plai,
lo vers, si fals motz lo sec.

I.
Belh m’es qui a son bon sen  
qu’en bona cort lo prezen,   
q’us bes ab autre s’enansa   
e ricx mestiers conogutz,    
lai on pus es mentaugutz,    
val mais qu’a la comensansa. 

II.
Doncx aissi·m dei far parven,
ieu que venc novellamen,     
e mostrar en detriansa       
lo saber que·m n’es cregutz, 
quar qui vas dos loc s’esdutz
leu l’en sort grans alegransa.

III.
Per que d’est comte aten      
de Barsalon’ un don gen,      
que pro·m fass’ e lhuy onransa;
e cre, si de dar non dutz,     
qu’en sa cort, on suy vengutz, 
es fams e vera mermansa.       

IV.
De baron m’es avinen           
qu’a verguonhos pessamen;      
tals o conoys que romansa:     
ans que s’en leu mager brutz,  
aitals afars trop saubutz      
non es grans mas per semblansa.

V.
Ara·us es ops, e non len,      
efforsar contra joven,         
qu’us encombriers vos sobransa 
de sai, on lo solelh lutz,     
en que seretz deceubutz,       
s’acortz no ven deves Fransa.  

VI.
Qu’ab un iovencel valen        
avetz lai guerr’ e conten,     
tal que fier si de sa lansa,   
que d’aquelhs Engles coutz     
ni dels vostres esternutz      
non a paor ni duptansa.        

VII.
Lai es lo vers remazutz        
on espazas sobr’escutz         
penran del forfag venjansa.
 

I.
Belh m’es qu’ieu fass’ huey mays un vers, 
pus la flors e·lh fuelha brota            
e·l belh temps nos a del lag ters         
que giet’ e plou e degota;                
e pus l’aura renovelha,                   
be·s tanh que renovel mos cors,           
si que flurisc’ e bruelh defors           
so que dedins mi gragelha.                

II.
Hai! pretz, quon iest mutz, sortz e guers,
e, proeza, co·us vey rota                 
e menar de tort en travers.               
Quar qui que·s vol si·us sabota           
q’una puta gens fradelha,                 
que tir’ e bat’ e pren a mors,            
vos an cofundut e destors,                
que·us afolh’ e·us descapdelha.           

III.
Greu m’es qu’estiers sera trop paucx      
lo pretz d’aquest segl’ aora,             
et ieu suy del castiar raucx              
e no·m val ges una mora;                  
q’usquecx a facha gonelha                 
corta resciza de mal vetz,                
et a·lh fait tant estreit cabetz          
que ia res non lay espelha!               

IV.
S’als malvatz no fos tan grans guaucx,    
avoleza ia no fora,                       
et es tant adubertz lo traucx             
que sobre rocas laora,                    
selh cuy iais cors, e martelha;           
qu’ayssi·ls ten enredatz lo retz          
non lur pot escantir lo setz              
ni·l crims: tan los rasc’ iselha!         

V.
Aquist engres, envers, estrait            
fals e flac filh d’avols paires,          
felo, embronc, sebenc, mal fait,          
sers ressis, nat d’avols maires,          
malastros paubr’ escudelha,               
volpillos, blau d’enveja, sec,            
fan que quascus aprent un quec,           
don nays e bruelha·l pustelha.            

VI.
Ara·m tuelh hueymais de lur plait         
dels forlinhatz d’avols aires;            
ma qui proeza vol, aguait                 
cum pros si’ e no·s tric guaires;         
que qui s’esfors’ e·s revelha,            
atretan tost, s’anc esser dec,            
sera ben pros hom malvatz: lec            
si no fos d’avol uzelha!                  

VII.
Hueymais si’ avols qui·s volra            
o pros, plus als no·n puesc doncas;       
que si pros es, ben i para                
o avols, si ben no·n broncas.             
E non sap qu’es calamelha                 
qui sauc cuia faire telh,                 
ni quant hom en autrui conselh            
si met, qui non l’i apelha.               

VIII.
Peire d’Alvernha mot quera                
qui acoint esquius a concas:              
e per aqui hom lo sabra,                  
car del fin trobar non roncas,            
ans n’as ben la flor plus belha:          
detorz e l’art e l’aparelh,               
e no·i a motz fals que rovelh             
ni sobredolat d’astelha.                  

IX.
On plus hom mos vers favelha,             
fe que·us deg, on mais valon elh          
e no·y a motz fals que y rovelh           
ni sobredolat d’astelha.                  
 

 
I.
Belha m'es la flor d'aguilen,
quant aug del fin joi la doussor
que fan l'auzelh novelhamen
pek temps qu'es tornatz en verdor
e son de flors cubert li renh,
gruec e vermelh e vert e blau.
 
II.
De molheratz no m'es pas gen
que·s fasson drut ni amador,
qu'ab las autris van aprenden
engienh ab que gardon las lor;
mas selh per cui om las destrenh
port'al braguier la contraclau.
 
III.
Vilas cortes ieis de son sen
e molherat dompneiador
e l'azes camiet eissamen,
quan vi·l lebrier ab son senhor;
mas ieu no cre pros dompna denh
far drut molherat gelos brau.
 
IV.
Molherat fan captenemen
dek envezit enganador:
l'autrui gran gasta e despen
e·l sieu met en luec salvador;
mas selh a cui grans fams a prenh
manja lo pan que no l'abau.
 
V.
Maritz que marit fai sufren 
deu tastar d'atretal sabor;
que car deu comprar, qui car ven,
e·l gelos met li grador,
pueis li laissa sa molher prenh
d'un girbaudo, filh de girbau. 
 
VI.
D'aqui naisson li recezen
qu'us non ama pretz ni valor;
a! com an abaissat joven
e tornat en tan gran error!
Cist tenon l'aver el destrenh,
e·l fel e·l gars son naturau.
 
VII.
Sancta Maria d'Orien,
guiza·l rei e l'emperador 
e faitz lor far ab la lor gen
lo servizi nostre senhor, 
qu'ill Turc conoscan l'entressenh
que dieus mori per nos carnau. 
 
VIII.
Aissi vai lo vers definen
et ieu que no·l puesc far lonjor;
que·l mals mi ten ab lo turmen, 
que m'a mes en tan gran langor
qu'ieu no sui drutz ni no m'en fenh
ni nuls jois d'amor no m'esjau. 
 
IX.
Non er mais drutz ni drutz no·s fenh
l'ospitars ni jois non l'esjau. 
 

 
I.
Breu vers per tal que meins i poing
fatz e que sia ben apres,
q'ieu sui trobaire, mas non ges
de celz rics qe·is fant auzir loing;
e s'anava mos chans tro lai
don la razons ven a mi sai,
ja non volria plus anes. 
 
II.
De trop ric'amor non ai soing,
sol de mon partage n'agues,
qe·l poders ni·l semblans non es
en mi ni fu faitz de tal coing
d'enquerre ric joi, ni s'eschai,
ni devenur que ben o sai 
no·m poiria qan be·i poignes.
 
III.
Mais dei doncs amar e mon poing
un bel auzellet q'ieutengues 
c'al cel doas gruas o tres,
per q'ieu non prec ni non somoing
d'amar dompna s'a far non fai;
ja·l fol cabrier non semblerai 
qu'enquis qe·il reina l'ames. 
 
IV.
Las ricas c'una non caloing
lais als rics donadors cortes,
c'una besseta m'a conques,
tal que de Paris tro al Groing
gensser non es ni mieills no·ill vai
a nuilla de fin pretz verai
ab lo poder qui·l ten en pes. 
 
V.
Ad aquesta soplei e joing
mas mans per referre merces, 
que la benanansa on m'a mes
mi val mais e ges no·m vergoing
si trop rica dompna non ai,
que·l sens e la beautz l'estai
tant aut que paucas li son pres.
 
VI.
De ma ricor, ni meins ni mai,
am e conosc que mieills m'estai 
que is trop autamen ames.   

I.
Cantarai d’aqestz trobadors        
que canton de maintas colors       
e·l pieier cuida dir mout gen;     
mas a cantar lor er aillors        
q’entrametre·n vei cen pastors     
c’us non sap qe·s mont’ o·s dissen.

II.
D’aisso mer mal Peire Rotgiers,    
per qe n’er encolpatz primiers,    
car chanta d’amor a presen;        
e valgra li mais us sautiers       
en la glieis’ o us candeliers      
tener ab gran candel’ arden.       

III.
E·l segonz, Girautz de Borneill,   
qe sembl’ oire sec al soleill      
ab son chantar magre dolen,        
q’es chans de vieilla porta-seill; 
que si·s mirava en espeill,        
no·s prezari’ un aiguilen.         

IV.
E·l tertz, Bernartz de Ventedorn,  
q’es menre de Borneill un dorn;    
en son paire ac bon sirven         
per trair’ ab arc nanal d’alborn,  
e sa mair’ escaldava·l forn        
et amassava l’issermen.            

V.
E·l quartz, de Briva·l Lemozis,    
us ioglars q’es plus qerentis      
que sia tro q’en Beniven,          
e semblari’ us pelegris            
malautes, qan chanta·l mesquis,    
c’a pauc pietatz no m’en pren.     

VI.
E·N Guillems de Ribas lo qins,     
q’es malvatz defors e dedins,      
e ditz totz sos vers raucamen,     
per que es avols sos retins,       
c’atretan s’en fari’ us chins;     
e l’uoil semblan de vout d’argen.  

VII.
E·l seises, Grimoartz Gausmars,    
q’es cavalliers e fai ioglars;     
e perda Dieu qui·l o cossen        
ni·l dona vestirs vertz ni vars,   
que tals er adobatz semprars       
q’enioglarit s’en seran cen.       

VIII.
Ab Peire de Monzo so set,          
pos lo coms de Tolosa·l det,       
chantan, un sonet avinen,          
e cel fon cortes qe·l raubet,      
e mal o fes car no·il trenqet      
aqel pe que porta penden.          

IX.
E l’oites, Bernatz de Saissac,     
c’anc un sol bon mestier non ac    
mas d’anar menutz dons queren;     
et anc puois no·l prezei un brac   
pois a·N Bertran de Cardaillac     
qes un vieil mantel suzolen.       

X.
E·l novens es En Raembautz,        
qe·s fai de son trobar trop bautz; 
mas eu lo torni en nien,           
q’el non es alegres ni chautz;     
per so pretz aitan los pipautz     
que van las almosnas queren.       

XI.
E N’Ebles de Saigna·l dezes,       
a cui anc d’amor non venc bes,     
si tot se chanta de coinden:       
us vilanetz enflatz plages,        
que dizen que per dos poies        
lai se loga e sai se ven.          

XII.
E l’onzes, Gonzalgo Roitz,         
qe·s fai de son chant trop formitz,
per q’en cavallaria·s fen;         
et anc per lui non fo feritz       
bos colps, tant ben non fo garnitz,
si doncs no·l trobet en fugen.     

XIII.
E·l dotzes, us veilletz lombartz   
que clama sos vezins coartz,       
et ill eis sent de l’espaven       
pero sonetz fai mout gaillartz     
ab motz maribotz e bastartz,       
e lui apell’ om Cossezen.          

XIV.
Peire d’Alvernge a tal votz        
que canta de sus e de sotz,        
e lauza·s mout a tota gen;         
pero maistres es de totz,          
ab c’un pauc esclarzis sos motz,   
c’a penas nuils hom los enten.     

XV.
Lo vers fo faitz als enflabotz     
a Puoich-vert, tot iogan rizen.    
 

I.
Chantarai pus vey qu’a far m’er           
d’un chant nou que·m gronh dins lo cays;  
chantars m’a tengut en pantays,           
cum si chantes d’aytal guiza              
qu’autruy chantar non ressembles,         
qu’anc chans no fon valens ni bos         
que ressembles autruy chansos.            

II.
Belh m’es quan l’alauza se fer             
en l’ayr, per on dissen lo rays,            
e monta, tro li·s bel que·s bays            
sobre·l fuelh que branda·l biza,            
e·l dous temps — qu’anc bona nasques! —     
entruebre·ls becx dels auzelhos,            
don retin lur chans sus e ios.              

III.
Qui a doncx amor e l’enquier,       
et amors brot’ e bruelh’ e nays,    
e qui l’es humils e verays,         
en breu d’ora l’a conquiza;         
q’umilitatz la vens ades            
e belhs semblans ab gent respos,    
qu’estiers no n’es hom poderos.     

IV.
Mays de mi, las!, qu’enayssi·l ser    
e re no n’ai mas quan lo fays:        
ayso meteys m’es lo grans iays,       
maier que qui·m dava Piza;            
e s’a lieys plagues qu’a sos pes      
vengues ves lieys de ginolhos         
e·lh disses un mot amoros! . . .      

V.
Amors, saber volgra quon er           
de nos dos, si·us plazi’, hueymays,   
que per re engrayssar no·m lays,      
mas quar no sai ma deviza;            
e podetz aver cor engres              
ves mi, qu’ieu non l’aurai ves vos,   
tro que·l cors rest de l’arma blos!   

VI.
Ab sol qu’ilh — ayso no m’esfer —  
non reblan gelos ni savays,        
que ia nulh dan, si be·s n’irays,  
no·l pretz una pauca briza.        
M’en puesca tener luenh ni pres,   
sia lausengiers o gilos,           
sol qu’ela·m sia a mos pros;       

VII.
sol sia que mos cors s’esmer,      
que ves autra part non biays!      
Qu’un’amors ad autr’enquier plays, 
si·n sabi’ esser auciza;           
e sapchatz, s’ieu tant non l’ames, 
ia non saupra far vers ni sos,     
e non o feira, s’ilh no fos.       

VIII.
Peire d’Alvernhe l’er cofes        
tant de servir e d’orazos,         
tro que li·n venha guizardos.      
 

I.
Cui bon vers agrad’ a auzir,     
de me lo cosselh qu’el escout    
aquest c’ara comens a dir;       
que pus li er sos cors assis     
en ben entendre·ls sos e·ls motz, 
ia non dira qu’el anc auzis       
melhors ditz trobatz lujnh ni prop.

II.
Ges ben no fai az escarnir         
qui l’au, ans deu agradar mout,    
si tot l’outracujat albir,         
ab lor nesci feble fat ris         
tornon zo qu’es d’amon de sotz;    
e·l be vezem que s’enantis         
e l’esquerns resta de galop.       

III.
E per tal fai s’en bon gequir,     
qu’anc esquerns ni coratg’ es tout:
si bruillet no sai vim florir,     
e par d’avol respeit iardis,       
can vei que la cima ni·l brotz     
non gieta frucha ni tequis,        
e l’intrador n’eisson tug clop.    

IV.
Era·s vol alre devezir:            
qui d’aver sai a gran comout       
be s’en deuria far servir;         
qu’en un mueg de marbotis          
no·us donaria doas notz,           
pos a la boca venra·l fis          
ni·l prestre secodra l’izop.       

V.
A quec deuria sovenir              
que non agues corag’ estout        
del be don nos devem iauzir,       
qu’en pauc d’ora es hom conquis;   
e can ven als deriers sanglotz,    
no li val honcles ni cozis,        
ni metges ab son issarop.          

VI.
Ben deuria pensar morir            
qui dreitz huils garda sus lo vout: 
cossi Dieus per nos a guerir        
receup mort, e pos mort aucis       
celui qui per nos venc en crotz;    
tug morrem, c’avers non gueris      
negun al temps plus que fetz Iop.   

VII.
Mes son intrat en lonc cossir       
cels qui son al derier escout       
c’a la mort no·s pot escremir       
coms ni reis ni ducs ni marquis,    
e, s’enantz no·s nedeia totz        
que la mortz li serre lo vis,       
be si pot, si·s vol, trigar trop.   

VIII.
Totz jorns vos poiria legir;        
mas preguem cel qu’es caps e fis    
que·ns garde del enfernal potz      
e que·ns met’ el sieu paradis       
lay on mes Ysach e Iacop.           
 

I.
De Dieu non puesc pauc ben parlar   
ni mout no·us en sai yssernir,      
quar gran res restari’ a dir        
e·l paucs es pus que non apar;      
mas pus ylh m’abriv’ en valor       
al belh sen si cuma parier          
ben tanh dir a dreg per s’amor      
so qu’al sieu poble a mestier.      

II.
Don dic cossi deu esguarar          
quals es ni que deu devenir,        
e s’om so meti’ en cossir           
ia res no·s deuria prezar;          
mas l’uelh belh tenon tenebror      
e l’esguart gloton desirier,        
e·l cors cossenten la folhor        
guida l’arm’ a mal destorbier.      

III.
De que·m puesc pro meravillar       
cum per se non pren hom albir;      
que, quan que·l tric, l’er a murir  
e pel pas ansessor passar;          
et en tan estranha flairor          
revertis qui·s pus bobansier        
qu’als auzens hi a gran feror,      
mas huey oblidon aquo d’ier.        

IV.
Mout es grieu e fort et amar        
als trespassans de desgiquir        
d’aysso de que·s degran aizir,      
ans que·ns sobrevengues afar;       
qu’ieu sai que tart, si contra·l cor,
no·s cobri hom ben del arquier       
que del colp sentra la viguor,       
quar trop val guarda de premier.     

V.
Mas grieus es hom a castiar          
que mais ama son dan chauzir;        
mas qui·s volgues tant enantir       
vas ben cum contra mal obrar,        
ia non perdera·l regn’ aussor        
pel ioy d’aquest mon messongier;     
quan la carn caitiv’ a sabor         
l’esperitz pren gran encombrier.     

VI.
E que·us puesc per peior contar      
d’ome, si·l vey ben resplandir       
de ren qu’el segl’ ay’ a formir,     
mas ab Dieu no·s sap acordar;        
e tot l’als es dezanador             
e desrefugen e corsier,              
per qu’om ren a son creator,         
pus mor, dels faitz respost entier.  

VII.
E pus Dieus nos denha donar          
vezer, entendre et auzir             
e sen e saber e sentir               
e tanta riquez’ ad uzar,             
be·ns degr’esser sovenidor;          
quar tort ten qui d’autruy terrier   
deven rics e del frug melhor         
es escas al don a sobrier.           

VIII.
Per qu’er escur so qu’ar es clar     
lay on Dieus mostrara·l martir       
qu’elh sostenc per nos a guarir;     
on nos sera totz a tremblar          
lo iorn del iutjamen maior,          
on non aura ren d’ufanier;           
qu’ab gran ioi et ab non pauc plor   
eissens desebran duy semdier.        

IX.
On chascuns se degra senhar          
et esser soven en sospir             
com Dieus se denhet humelir          
e que pres per los sieus salvar,     
e quan pauc porton tug del lor       
seguentre lo sanglot derrier;        
quar mout met estreicha labor        
cel que trop s’en fai parsonier.     

X.
E com lo blanc e·l vert e·l var      
sostenc, el fai demeg servir;        
don no·il platz alcus bes ufrir      
per aquel qui n’ar’ a penar.         
E totz temps reviura dolor           
tot so qu’el segl’ es d’alegrier,    
car aver vas nostre Senhor           
ni quan qu’es no val un dinier.      

XI.
A! co·s pot pauc quascus fiar        
en quan say laissa al transir,       
si·lh eys no so sap devezir          
tan gen que·s puesca profichar;      
e tan breu vid’ an li pluzor,        
vilan e clerc e cavalier,            
e tan tost torn’ en amargor          
lo ioys d’aquest segle leugier.      

XII.
Mas Dieus per la sua doussor         
nos don cum siam tal obrier,         
que·ns acuelha en resplandor         
on li sieu sanh son eretier. Amen.
 

I.
Deiosta·ls breus iorns e·ls loncs sers,   
qan la blanc’aura brunezis,               
vuoill que branc e bruoill mos sabers     
d’un nou ioi qe·m fruich’ e·m floris;     
car del doutz fuoill vei clarzir los garrics, 
per qe retrai entre·ls enois e·ls freis       
lo rossignols e·l tortz e·l gais e·l pics.    

II.
Contr’aisso m’agrada·l parers                 
d’amor loindan’ e devezis                     
car pauc val levars ni iazers                 
a lui ses lieis cui es aclis;                 
c’amors vol gaug e guerpis los enics,         
e qui s’esgau a l’ora q’es destreis,          
be·m par q’a dreit li vol esser amics.        

III.
Q’ieu vei e crei e sai q’es vers              
c’amors engraiss’ e magrezis                  
l’un ab trichar, l’autr’ ab plazers           
e l’un ab plor e l’autr’ ab ris;              
lo cals qe·s vol n’es manens o mendics,       
per qu’ieu n’am mais so qu’en ai q’esser reis 
assatz non — re d’Escotz ni de Galics.        

IV.
Ges ieu non sai los capteners                 
mas soffre, c’una m’a conquis                 
don reviu iois e nais valers,                 
tals que denan li·m trassaillis;              
car no m’enqier de dir, m’en ven destrics,    
tan tem qe·l mieils lais e prenda·l sordeis;  
on plus n’ai cor, mi pens: car non t’en gics? 

V.
A! car si fos dels mieus volers               
lo sieus rics coratges devis,                 
desque ma dompna·m tol poders                 
de so de q’ieu plus l’ai requis!              
Mas no·ll sai dir lausengas ni prezics,       
mas meillor cor l’ai trop que non pareis;     
s’ella no·l sap, morrai m’en totz antics.     

VI.
Tant m’es doutz e fis sos vezers              
pel ioi qe·m n’es al cor assis                
e sobre tot lo bons espers                    
q’ieu n’ai, per que m’en enriquis;            
c’anc tant non fui mais coartz ni mendics,    
ab q’ieu la vis alques, aqui mezeis           
no·m saubes far de gran paubretat rics.       

VII.
So es gaugz e iois e plazers                  
que a moutas gens abellis                     
e sos pretz mont’ a grans poders              
e sos iois sobreseignoris,                    
q’enseignamens e beutatz l’es abrics:         
dompneis d’amor, q’en lieis s’espan e creis,  
plens de dousor, vertz e blancs, cum es nics; 

VIII.
per q’ieu mi pens: ia non t’en desrazics,     
quan mi conquis en loc on ilh me seis         
plus que se·m des Franssa lo reis Loics.      

IX.
En aqest vers sapcha vilans, Audrics,         
que d’Alvernge manda c’om ses dompneis        
no val ren plus que bels malvatz espics.