| Can chai la fueilla. dels ausors en tresims. elfreitz sergueilla. don sechal uims. dels dous refrims. uei sor dezir labrueilla. mas ieu soi prims. da mor qui que sen tueilla. |
Arnaut daniel. Can chai la fueilla dels ausors entresims e.l freitz s’ergueilla don secha.l vims, dels dous refrims vei sordezir la brueilla: mas ieu soi prims d’Amor, qui que s’en tueilla. |
| Tot es gelat mas ieu non puesc fre zir. camor nouela mi fal cor reuerdir. no(n) dei fremir. camors mi cuebrem cela. em fai tener ma ualor em cabdela. |
Tot es gelat, mas ieu non puesc frezir c’amor novela mi fa.l cor reverdir; non dei fremir c’Amors mi cuebr’e.m cela e.m fai tener ma valor e.m cabdela. |
| Bones vida quan ioia la mante. que tals mescrida. cui ges nouai tan be. nom sai dere. coreillar qui mescrida. que permafe del mieils ai ma partida. |
Bon’es vida quan Ioia la mante, que tals m’escrida cui ges no vai tan be; no.m sai de re coreillar qui m’escrida, que per ma fe del mieils ai ma partida. |
| De drudaria. nom sai de re blasmar. cautrui paria. terra tornen reizarar. ges absa par. no sai eguar. mamia. cu na non sai. que segonda noill sia. |
De drudaria no.m sai de re blasmar, c’autrui paria terra torn’en reizarar; ges ab sa par no sai eguar m’amia c’una non sai que segonda no.ill sia. |
| No uueill sasemble. mos cors abautr amor. si quen ueial mamble. ni uolual cap aillor. nonai paor. que ia cel depon tremble. naia gensor. de lieis ni que la semble. |
No vueill s’asemble mos cors ab autr’amor si qu’en veial m’amble ni volva.l cap aillor: non ai paor que ia cel de Pontremble n’aia gensor de lieis ni que la semble. |
| Ges non es croia. cella cui soi amis. de sai sauoia. plus bela nos noiris.tal mabelis. don ieu plus ai de ioia. non ac paris. delena sill de troia. |
Ges non es croia cella cui soi amis; de sai Savoia plus bela no.s noiris; tal m’abelis don ieu plus ai de ioia non ac Paris d’Elena, sill de Troia. |
| Tan pareis genta. cella q(ue)m te ioios.las gensors trenta. uens debelas faisos. ben es razos. doncas que mos chans senta.q(ua)r es tan pros. ederic pretz manenta. |
Tan pareis genta cella que.m te ioios, las gensors trenta vens de belas faisos: ben es razos doncas que mos chans senta, quar es tan pros e de ric pretz manenta. |
| Vai ten chansos. denan lieis ti preze(n)ta. que sill no fos. noi meirarnautz sente(n)ta. |
Vai t’en chansos, denan lieis ti prezenta, que s’ill no fos no.i meir’Arnautz s’ententa. |