Raimons dae miraual [R]aimon demiraual si fu un paubres caualiers qe no(n) a auia mais laqarta part delcha stel de miraual Et en aqel cha stel non estauon .xl. home mas p(er) loseu bel dire (et) car elsaup plus damor (et) de do(m)pnei cautre (et)de totz los faitz auinenz (et)detotz los ditz plasenz q(ue) corron entrels amadors (et) amaritz Et fo mout onratz (et) tengut p(er) lo conte de to losa qel clamaua audiartz (et) ell lui El coms lidaua los cauals (et) las armas eldraps qell beson gnauen Et era seigner delui (et) deson alberc (et) seigner del rei pei re daragon (et) del uesconte de berses (et) de Bertram desaisac (et) de totz los gra(n)s baros daqella encontrada Et no(n) era neguna grans do(m)pna entotas aqella en contradas q(e) no(n) desires (et) no(n) sepe nes qell sentedes enella o qel iuolgues p(er)demestigessa Car el la saubia plus onrar (et) far gra çir qe nuill autrom p(er)qe neguna no(n) cresia estre p(re)siada seno(n) fos sos amics Raimon de miraual En mantas do(m)pnas entendet (et) fetz mantas bonas cha(n)sos Et no(n)se creset mais qel deneguna ague(s) ben endreit damor Et totas longanneren |
Raimon dae Miraval [R]aimon de Miraval si fu un paubres cavaliers qe non avia mais la qarta part del chastel de Miraval. Et en aqel chastel non estavon .xl. home. Mas per lo seu bel dire et car el saup plus d’amor et de dompnei c’autre e de totz los faitz avinenz e de totz los ditz plasenz que corron entre·ls amadors e amaritz et fo mout onratz et tengut per lo conte de Tolosa, qe·l clamava Audiartz et ell lui. E·l coms li dava los cavals e las armas e·l draps qe·ll besognaven. Et era seigner de lui et de son alberc et seigner del rei Peire d’Aragon e del vesconte de Berses et de Bertram de Saisac e de totz los grans baros d’aqella encontrada. Et non era neguna grans dompna en totas aqella encontradas que non desires et non se penes qe·ll s’entendes en ella, o qe li volgues per demestigessa, car el la saubia plus onrar e far graçir qe nuill autr’om, per qe neguna non cresia estre presiada se non fos sos amics Raimon de Miraval. En mantas dompnas entendet et fetz mantas bonas chansos; et non se creset mais q’el de neguna agues ben en dreit d’amor. Et totas l’onganneren. |