I.
Pois Raimons e Trucs Malecs
chapten n'Aena e sos decs,
anz serai viels e senecs
que <eu> m'acort en aitals precs
don puesca venir tan grans pecs
c'al cornar l'agra mestier becs
ab que·l traisses del corn los grecs,
e pueis pogra ben esser secs
que·l fums es fortz qu'ieis dinz dels plecs.
II.
Be l'agra'obs que fos becutz
e·l becs fos loncs e agutz,
que·l cors es fers e pelutz
e prions dinz en la palutz
per que rellent ensus lo glutz,
e nuil iorn no estai essutz:
c'a desprez i corne rendutz,
e no taing que mais sia drutz
cel que sa boc'al corn condutz.
III.
Pro·i agra d'autres assais
de plus bels, que valgron mais,
e s'en Bernart s'en estrais,
per Crist, anc no·i fes que savais
car l'en pres paors et esglais
que, si·l vengues d'amon lo rais,
tot l'escalfera·l col e·l cais,
e no cove que dompna bais
sel que corna lo corn putnais.
IV.
Bernart, ges eu no m'acort
al dig Raimon de Durfort
que vos anc n'aguessetz tort,
que si cornavas per deport
ben trobavas fort contrafort
e la puidors agra·us tost mort,
que pietz ol no fa fems en ort
e vos, qui que·us en desconort,
lauzas en Dieu que·us n'a estort.
V.
Be es estortz de peril,
que retrag fora son fil
e a totz cels de Cornil;
mielz li vengra fos en eisil
que la cornes el enfonil
entre l'esquin'e·l penchenil
per on s'esegon li rovil:
ia no saubra tan de gandil
no·l compisses lo groing e·l cil.
VI.
Dompna, ges Bernart no·s trail
del cor cornar ses gran dosil
ab que·l seï[m] traig del penil,
pois poira cornar sens peril.
I.
Pois Raimons e·n Trucs Malecs
chapten n’Ayman e sos decs,
enans serai vieills e canecs
ans que m’acort en aitals precs
don puosca venir tant grans pecs;
c’al cornar l’agra mestier becs
ab qe·il traisses del corn los grecs;
e pois pogra ben issir secs
qe·l fums es fortz q’ieis dinz dels plecs.
II.
Ben l’agr’obs que fos becutz
e·l becs fos loncs et agutz,
qe·l corns es fers, laitz e pelutz
e nul iorn no estai essutz,
et es prion dins la palutz
per que rellent’en sus lo glutz
c’ades per si cor ne rendutz;
e non voill que mais sia drutz
cel que sa boch’ al corn condutz.
III.
Pro·hi agra d’autres assais,
de plus bels que valgron mais,
e si en Bernatz s’en estrais,
per Crist, anc no·i fetz que savais,
car l’en pres paors et esglais.
Car si·l vengues d’amon lo rais
tot l’escaldera·l col e·l cais;
e no·is cove que dompna bais
aquel qui cornes corn putnais.
IV.
Bernatz, ges eu no m’acort
al dig Raimon de Durfort
que vos anc mais n’aguessetz tort;
que si cornavatz per deport
ben trobavatz fort contrafort,
e la pudors agra·us tost mort,
que peiz oil non fa fems en ort;
e vos, qui qe·us en desconort,
lauzatz en Deu qe·us n’a estort.
V.
Ben es estortz de perill
que retraich for’a son fill
e a totz aicels de Cornill;
mieills li fora fos en issill
qe·l la cornes en l’efonill
entre l’eschin e·l penchenill
lai on se sangna de rovill;
ia non saubra tant de gandill
no·il compisses lo groing e·l cill.
VI.
Dompna, ges Bernatz non s’estrill
del corn cornar ses gran dozill
ab que seire·l trauc del penill,
puois poira cornar ses perill.