I.
D'amours, qui m'a tolu a moi,
N'a soi ne me veut retenir,
Me plain ge si, qu'ades otroi,
Que de moy face son plaissir;
Et je, qui ne m'i puis tenir,
Que je ne chant et di pourquoi,
Quant ceus, qui la traissent, voi
Souvent a grant joie venir
Et j'y fail par ma bonne foy.

II.
Amours pour essaucier sa loy
Veut ses anemis convertir,
De sens li vient, si com je croy,
Qu'as siens ne puet elle faillir;
Et je, qui ne m'i puis partir
De celle, vers qui me souploi,
Mon cuer, qui siens est, li envoi,
Mais de noient la cuit servir,
Quant celi rent ce que je li doi.

III.
Dame, de ce, que vostres sui,
Ditez moi, se gre m'en savez.
Nenil, se j'onques vous connui,
Ainz vous poisse, que vous m'avez,
Et puisque vous ne me voulez,
Dont sui ge vostres par anui.
Mais se ja deviez de nului
Merci avoir, si me souffres,
Que ne puisse servir autrui.

IV.
Ainques dou buvraige ne bui,
Dont Tristans fu enpoissonnez,
Car plus me fait amer, que lui,
Fins cuers et bonne voulentez;
Bien en doit estre miens li gres,
Qu'ainz de rien esforciez ne fui,
Fors tant, que les mienz eulz en crui,
Par cui sui en la voie entrez,
Dont ja n'istrai, n'ainz n'en recrui.

V.
Cuers, se ma dame ne t'a chier,
Ja pour ce ne t'en partiras!
Touz jours soiez en son dengier,
Puis qu'empris et commancié l'as;
Ja mon los plenté n'ameras,
Ne pour chier tans ne t'anoier,
Biens amenrist par delaier;
Quar quant plus desirre l'auras,
Plus t'en ert douls a l'essaier.

VI.
Merci trouvasse au mien cuidier,
S'elle fust en tout le compas
Del monde la, u je la quier;
Mais je cuit, qu'elle n'i est pas;
Car ainz ne fui faintiz, ne las
De ma douce dame proier;
Proi et reproi sanz recouvrier,
Si com cil, qui ne set a gas
Amours servir ne losengier.

I.
D'Amors, qui m'a tolu a moi
N'a soi ne me veut retenir,
Me plaing ensi, qu'adés otroi
Que de moi face son plesir.
Et si ne me repuis tenir
Que ne n'en plaigne, et di por quoi:
Car ceus qui la traïssent voi
Souvent a lor joie venir
Et g'i fail par ma bone foi.

II.
S'Amors pour essaucier sa loi
Veut ses anemis convertir,
De sens li vient, si come je croi,
Qu'as siens ne puet ele faillir.
Et je, qui ne m'en puis partir
De celi vers qui me souploi,
Mon cuer, qui siens est, li envoi;
Mes de noient la cuit servir
Se ce li rent que je li doi.

III.
Dame, de ce que vostres sui,
Dites moi se gre m'en savez.
Nenil, se j'onques vous conui,
Ainz vous poise quant vous m'avez.
Et puis que vos ne me volez,
Dont sui je vostres par ennui.
Mes se ja devez de nului
Merci avoir, si me souffrez,
Que je ne sai servir autrui.

IV.
Onques de buvrage ne bui
Dont Tristan fu enpoisonnez;
Mes plus me fet amer que lui
Fins cuers et bone volentez.
Bien en doit estre miens li grez,
Qu'ainz de riens efforciez n'en fui,
Fors que tant que mes euz en crui,
Par cui sui en la voie entrez
Donc ja n'istrai n'ainc n'en recrui.

V.
Cuers, se ma dame ne t'a chier,
Ja mar por cou t'en partiras:
Tous jours soies en son dangier,
Puis qu'empris et comencié l'as.
Ja, mon los, plenté n'ameras,
Ne pour chier tans ne t'esmaier;
Biens adoucist par delaier,
Et quant plus desiré l'auras,
Plus t'en ert douls à l'essaier.

VI.
Merci trovasse au mien cuidier,
S'ele fust en tout le compas
Du monde, la où je la quier;
Mes bien croi qu'ele n'i est pas
Car ainz ne fui faintis ne las
De ma douce dame proier:
Proi et reproi sanz esploitier,
Conme cil qui ne set a gas
Amors servir ne losengier.