I.
Assez plus que d'estre amez
me sui penez d'avoir chier;
toz m'i sui entroblïez,
tant sui en autrui dangier.
Por vos m'estuet tot leissier,
dame, a cui sui toz donez:
cuer, pensee, et volentez
ai mis en vostre prison.
Souviegne vos de moi, bele;
ja ne pens je s'a vos non.
II.
Dame, par moi sui grevez,
quant je en vos ma mort quier
en regardant vos beautez,
dont naissent mi desirrier,
c'ainc ne vint mes eus proier
vos gens cors d'estre esgardez.
Mes estre en doit pluz blasmez
vos cuers que ne di, ce croi;
quant pluz sa merci desir,
pluz est crüeus envers moi.
III.
Li grés, dame, est entamez
par l'iaue sovent touchier;
mes je ne voi vo cruautez
de mes lermes enforcier
et vostre amor eslongier
fait de moi humilitez,
s'en sui si desesperez
ke je n'atent fors la mort.
D'amor trop lotainne
n'atent nul confort.
IV.
Cil qui sevent a toz les
novele amor acointier
ne sentent pas teus grietez
com je par mon desirrier;
ainc ne m'osa aprochier
trahisons ne faussetez,
mais douçors et loiautez
si poissanz ke je bien sai,
quant ces amors me faudront
ke j'ai, ja mais n'amerai.
V.
De ma dame sui doutez,
mes, certes, n'eüst mestier;
ne sui pas a li remez
por son pris desavancier;
dons qui puisse honor blecier
n'iert ja par moi demandez.
S'amor m'otroit, c'est asses
po guarir ami loial;
s'ele me deignoit amer,
ja je n'averoie mal.
I.
Asses plus ke d'estre ames
Me sui penes d'avoir chier.
Tos mi sui entroblies,
Tant sui en autrui dangier.
Per vos m'estuet tot laissier,
Dame, a cui sui tos dones;
Cuer, pensee et volentes
Ai mis en vostre prison.
Sosviegne vos de moi bele;
Ja ne pens jou s'a vos non.
II.
Dame, par moi sui greves,
Quant jou en vos ma mort quier
En regardant vos beautes
Dont naissent n i desirier,
K'ainc ne vint mes iex proier
Vos gens cors d'estre esgardes,
Mais estre en doit plus blames
Vos cuers ke ne di, ce croi,
Quant plus sa merchi desir,
Plus est cruex envers moi.
III.
Li gries est, dame, entasmes
Par l'aige sovent touchier,
Mais je voi vo cruautes
De mes larmes enforchier,
Et vostre amor eslongier
Fait de moi humilites,
S'en sui si desesperes
Ke jou n'atec fors la mort.
D'amor trop lontainge
N'atenc nul confort.
IV.
Cil ki sevent a tos les
Novele amor acointier
Ne sentent pas tes grietes
Com jou par mon desirier;
Ainc ne m'osa aprochier
Traisons ne fausetes,
Mais douchors et loiautes
Si poissans ke jou bien sai,
Quant ces amors me fauront
Ke j'ai, ja puis n'amerai.
V.
De ma dame sui doutes,
Mais certes n'eust mestier
Ne sui pas a li remes
Por son pris desavanchier;
Dons ki puist honor blechier
N'ert ja par moi demandes
S'amor m'otroit, c'est asses
Por garir ami loial;
S'ele me daignoit amer,
Ja puis je n'aroie mal.