Linker 65,30; RS 1735
Mss.: C 52 (Deux gairt ma dame et doinst honor et joie) = Gace Brulé; O 45, U 21 = anonimo.
Metrica: a10' b10 a10' b10 b10 b10 b10 a10' (MW 978,1). Chanson di 3 coblas unissonans di 8 versi; mot refrain ai vv. 1 e 8 di ciascuna cobla (ma v. 11?).
Edizioni: Petersen Dyggve 1951, p. 442.
I.
Deus saut ma dame et doint honor et joie
qui d'amors m'a mon chant, renovelé.
He las! iriez et sanz amor estoie,
mais ele m'a de mon corrouz osté.
Leals Amors cui j'en doi savoir gré
tot mon anui m'a a joie torné.
Or me plaist chans et fuelle et flors d'esté,
k'Amors me fait de ma grant dolor joie.
II.
Liez sui je molt et bien doi avoir joie
quant ma dame m'a dit et conmandé
que je por li chant et demoigne joie,
soie merci, quant il li vient a gré.
Pues k'ele m'a de la dolor geté
ou mes fins cuers a lonc tens demoré,
Amors m'a si mon affaire atorné:
tuit mei panser sont de bien et de joie.
III.
Liez sui je molt et doi avoir grant joie
de vostre amor, dolce dame, en non Dé,
k'amorox sui en quel leu que je soie,
quant me sovient de vostre grant bealté,
de vostre vis cler, plain d'umelité.
Quant je vos voi et venir et aler
lors m'est avis que jaie tot trové:
or doigne Deus que de vos soit ma joie.