I.
Por mau tens ne por gelee 
ne por froide matinee 
ne por nule autre riens nee 
ne partirai ma pensee 
d'amors que j'ai, 
que trop l'ai amee 
de cuer verai. 
Valara!
 
II.
Bele et bionde et coloree, 
moi plest quanq'il vous agree. 
He, Deus! car me fust donee 
l'amor que vous ai rouvee! 
Quant prierai, 
s'ele m'est veee, 
je me morrai. 
Valara!
  
III.
Dame, en la vostre baillie 
ai mis mon cors et ma vie. 
por Deu, ne m'ocïez mie! 
La ou fins cuers s'umilie 
doit on trouver 
merci et aïe 
pour conforter. 
Valara!
  
IV.
Dame, faites cortoisie! 
plaise vos que en ma vie 
iceste parole die: 
ma bele, tres douce amie 
vos os nonmer, 
c'onques n'oi envie 
d'autrui amer. 
Valara!
 
V.
Onques jor ne me soi plaindre, 
tant seroit ma dolor graindre; 
ne d'amer ne me sai faindre, 
ne mes maus ne puis estaindre, 
se je ne di 
que touz vueil remaindre 
en sa merci. 
Valara!
  
VI.
Trop seroit fort a estaindre 
chansons de li; 
l'amors est a fraindre, 
dont pens a li. 
Valara!