I.
Je ne puis pas bien metre en nonchaloir 
que je ne chant, quant Amors m'en semont, 
que de ç'ai je le greigneur duel du mont 
que je n'os pas descouvrir ma pensee, 
ce dont je voi les autres decevoir. 
Tels fet senblant d'amor qui point n'i bee; 
por ce chant je que g'en refraig mon plor, 
et s'en atent joie après ma dolor.
  
II.
Ceste dolor me devroit mult seoir 
qui est sanz rive et n'i a point de font; 
et s'il est nus qu'autrement m'en respont, 
je l'en avrai mult tost reson moustree; 
qu'après granz maus, ce dit on tot por voir, 
est mainte foiz grant joie recouvree. 
s'il ensi est, dont n'ai je pas poor 
que de mes maus n'aie bien le retor.
 
III.
Ice retor, Deus! Et quant l'avrai gié? 
Certes, dame, de vos sole l'atent. 
Les voz biautez et vostre fin senblant 
me font avoir une bone esperance; 
et si ne sai se je ai foloié, 
que mult redout de vous fausse senblance. 
Ensi le di, que ne m'en puis celer, 
ne ne m'en puis partir ne remuër.
  
IV.
Dou remuër ja ne prendrai congié, 
nel feroie por riens qui soit vivant; 
si i parra, quant mis m'en sui en tant 
que j'atendrai queus sera ma cheance, 
et couverrai ensi mon cuer irié 
et si savrai s'Amors a conoissance, 
ne s'ele set ami guerredoner. 
Ja n'i perdrai pour belement celer.
  
V.
Celer dit on que mult vaut a ami, 
mès ne m'en puis apercevoir de rien. 
Li miens celers me fet plus mal que bien, 
que jangleor, qui poignent et atisent, 
vont tant parlant que tantost ont merci, 
ne le mentir une feve ne prisent. 
Et je, dame, me rent a vos pensis, 
hunbles, celanz et fins, loiaus amis.
  
VI.
Nus hons n'ert ja de bien amer espris, 
s'il est de cuer decevanz et faintis.