I.
Qui sert de fausse proiere
bien est resons qu'a mal aut,
que de pensee doubliere
ne puet nus monter en haut.
Pour ce ne me chaut
d'amors nouveliere:
une en ai fine et entiere
qui touz jorz m'asaut,
si ne m'en puis trere arriere.
II.
Douce dame droituriere,
se pitiez en vos defaut
mort m'avez en tel maniere
nul confort riens ne mi vaut.
De poor tressaut
mon cuer et ma chiere
n'aperçoivent mauparliere
gent qui trop sont baut
de mesdire par deriere.
III.
Dame, en vostre seignorie
me sui mis tout ligement.
Pour Dieu car aiés envie
de moi fere alegement,
car a vos me rent
de mort et de vie.
Se j'ai pensé a folie
si tres hautement,
ne m'en soiés anemie.
IV.
En grant deport us ma vie,
quant regart vostre cors gent
et vostre grant cortoisie.
Et vostre bouche riant
de biauté resplent
et d'avenandie,
dame, en qui bontez se lie
et proëce et sens,
deseur toutes seignorie.
V.
Se seu pleüst que je fusse
de ma dame li plus hauz,
certes bon gré l'en seüsse;
més trop par est conmunaus.
Mult i a de çaus
[...iere]
qui dellient aumosniere,
s'en font leur aviaus,
et g'en sui boutez arriere.