I.
N'est pas a soi qui aime coraument,
Ne cil amis qu'amours ne puet destraindre,
Et sachiez bien, qui vers li se defent,
Ne poroit pas a grant honour ataindre.
Li viguerous ne s'i puënt deffendre,
Mais qui plus vaut plus tost s'i leisse prendre,
Car d'amour sont tuit li bien a devise,
Ne ja sans li n'ert grant joie conquise.
 
II.
Faus et felons voi costumierement,
Qui se painent d'abessier et d'estaindre
Joie et henor sans lor amendement;
Mes fine amours ne puet pour eus remaindre.
Mal m'ont il fet, mes ja pour ce n'iert mendre
Ma volenté de servir ne d'atendre.
Si servirai, mes ne sai en quel guise
Viegne si haut de si bas par servise.
 
III.
Deus qui en moi fist plus qu'en autres cent
Amors venir et nestre et croistre et maindre,
M'en dont joïr einsi veraiement
Con je n'ai cuer ne volenté de faindre
Vers ma dame, cui ne l'os faire entendre;
Mieus vueil mon cors de bele mort sorprendre
Qu'ele soit ja par moi nul jor requise;
Qu'ele set bien qu'est pitiez et franchise.
 
IV.
Se touz li monz savoit ce que je sent,
Nes li felon devroient ma mort plaindre;
Qu'en morant vif si com Amors consent,
Mes ne me puet trop grever ne destraindre.
Bon gré m'en sai qu'onques osai emprendre
Si haute amor, qu'en moi ne doit descendre
Li guerredons, dont ja nen iert requise
Cele ou valors et biautez est assise.
 
V.
Je n'ai mestier de desconfortement,
N'a male gent ne se fait nus complaindre;
Mes qui d'amors sait bien, voit et entent
Que grans amors n'est pas legiere a faindre,
Quant il li plest en fin cuer a descendre,
Que n'a pooir qu'a li puisse contendre;
Mes ele est si dedens mon cuer assise,
La merci Dieu, qu'a mon gré me jostise.
 
VI.
Tote autre riens ocist home et debrise
Fors sol amors, quant ele est a droit prise.
 
VII.
Renaut, chantez, qui amez sanz feintise,
Car lessié l'ont li dui de Saint Denise.
 

I.
N'est pas a soi qui eimme coraument,
ne cil amis qu'Amours ne puet destraindre,
et sachiez bien, qui de li se desfent,
qu'il ne porroit a haute honnour ataindre.
Li viguerouz ne s'i pueent desfendre,
maiz qui miuz vaut plus tost s'i leisse prendre,
quar d'Amours sunt tuit li bien a devise,
ne ja sanz lui n'iert grant joie conquise.
 
II.
Faus et felons voi costumierement,
qui se painnent d'abaissier et d'estaindre
joie et honour sanz lor amendement;
maiz granz amours ne puet pour eus remaindre.
Mal m'ont il fait, maiz ja pour ce n'iert mendre
ma volenté de servir ne d'atendre.
Si servirai, maiz ne sai en quel guise
viegne si haut de si bas par servise.
 
III.
Diex qui en moi fist pluz qu'en autres cent
Amours venir et nestre et croistre et maindre,
m'en doint joïr issi veraiement
con je n'ai cuer ne nul talent de faindre
vers ma dame, qui ne l'os faire entendre;
mieuz vueill mon cors de bele mort souprendre
qu'ele soit ja nul jour par moi requise,
maiz el set bien qu'est pitiez et franchise.
 
IV.
Se touz li mons savoit ce que je sent,
nis li felon devroient ma mort plaindre,
qu'en morant vif, si con Amours consent;
maiz ne me puet trop grever ne destraindre.
Tel gré m'en sai c'onques osai emprendre
si haute amour qu'en moi ne doit descendre
li guerredons, ne ja n'en iert seurquise
cele u valors et biautez est assise.
 
V.
Je n'ai mestier de desconfortement,
n'a male gent ne se fait nul complaindre;
maiz qui aimme, set et voit et entent
que granz amours n'est pas legiere a faindre,
quant il li plait en fin cuer a descendre,
que n'a pooir qu'a li puisse contendre;
et ele est si dedenz mon cuer reprise,
la merci Dieu, qu'a mon gré me justise.
 
VI.
Toute autre riens ocist home et debrise
fors soul amors, quant ele est a droit prise.
 
VII.
Chantez, Renaut, qui amez sanz faintise,
quar leissié l'ont li dui de Saint Denise.