​I.
Pour faire l'autrui volenté
chanterai, si n'en ai talant,
si n'ai pas en amor trové
joie ne solaz dont je chant,
ne ja cil ne m'en saichent gré
qui m'ont a lor voloir blasmé:
li menteour felon taisant.
 
II.
Je chant a guise d'esgaré
qui ne set que se va querant,
car je n'aim pas d'amors, ainz hé
la fause que j'amoie tant;
mais por descovrir mon pansey
que j'ai plus dedenz enceley
m'estuet faire joious talant.
 
III.
En nuisement mi a grevé
fause Amors male et decevant
qui longuement m'a si pené
que se j'amase un pou avant
mort m'eüst a sa volenté,
si feïst de moi cruauté,
quant vers li n'ai ma joie grant.