I.
Oëz por quoi plaing et sospir:
Seignor, n'en fes pas a blasmer.
Toz jors m'estuet ma mort servir;
Amors, n'en puis mon cuer oster;
Mes honor ai d'einsi morir;
Si en vueil bien les max sofrir,
Tant que plus en puisse monter.
 
II.
S'Amors me fait ses maus sentir
Il ne m'en doit mie peser,
Qu'autres nes puet mais sostenir
Une hore, sens soi reposer;
Mes je sui amis sens mentir,
Ja Deus ne m'en lest repentir!
Car en amant vueil bien finer.
 
III.
Amor, tel hore fu jadis
Qu'estre me laissïez en pes;
Mais or sui je verais amis,
N'autre riens ne me grieve mes.
Serai je donc de vos ocis?
Nenil; trop avrïez mespris
Quant je tot por vos servir les.
 
IV.
Cuers, qu'en puis mes se sui pensis,
Quant tu m'as chargié si grief fes?
– Ha! cors, de neant t'esbahis,
Ja n'ama onques hom mauvès.
Serf tant que tu aies conquis
Ce que plus desires toz dis.
– Voire, cuers, més la morz m'est pres.
 
V.
Gui de Pontiaus, en fort prison
Nos a mis Amors sens confort,
Vers celes qui sanz ochoison
Nos ociront; dont ele a tort.
Oïl, car leaument amon;
Ja ne nos en repentiron.
Bon amer fait jusqu'a la mort.
 
VI.
Gasçoz define sa chançon.
Ha! fins Pyramus que feron?
Vers Amors ne somes jor fort.
  

I.
Oez por quoi plaing et sopir,
seignor, n'en fais pas a blasmer.
Touz jors m'estuet ma mort servir;
Amors, n'en puis mon cuer oster;
mais honor ai d'ensinc morir,
si en vuil bien les max souffrir,
tant qu'a plus en puisse monter.
 
II.
S'Amors me fait ses max sentir
il ne m'en doit mie peser,
qu'autres nes puet mais soustenir
une hore, sanz soi reposer,
mais je sui amis sanz mentir,
ja Dex ne m'en lait repentir!
Car en amant vuil bien finer.
 
III.
Amors, tele hore fu jadis
qu'estre me laissïez en pés;
mais or sui je verais amis,
n'autre riens ne me grieve més.
serai je donc de vos ocis?
Nenil; trop avrïez mespris,
quant je tout por vos servir lés.
 
IV.
Cuers, qu'en puis més se sui pensis,
quant tu m'as chargié si grief fés?
– Ha! cors, de neant t'esbahis,
ja n'ama onques hom mauvais.
Ser tant que tu aies conquis
ce que plus desirres toz dis.
– Voire, cuers, més la morz m'est prés.
 
V.
Gui de Ponciaus, en fort prison
nos a mis Amors sanz confort
vers celes qui sanz achoison
nos ocirront. dont n'est ce tort?
Oïl, car lëaument amon;
ja ne nos en repentiron.
Bon amer fait jusqu'a la mort.
 
VI.
Gaçot define sa chanson.
Ha! fins Pyramus que feron?
Vers Amors ne somes jor fort.