I.
Bele Doette as fenestres se siet, 
lit en un livre, mais au cuer ne l'en tient, 
de son ami Doon li ressovient, 
qu'en autres terres est alez tornoïer. 
E or en ai dol.

II.
Uns escuiers as degrez de la sale 
est dessenduz, s'est destrossé sa male. 
Bele Doette les degrez en avale, 
ne cuide pas oir novele male. 
E or en ai dol.

III.
Bele Doette tantost li demanda: 
- ou est mes sires que ne vi tel pieça? - 
Cil ot tel duel que de pitié plora. 
Bele Doette maintenant se pasma. 
E [or en ai dol.]

IV.
Bele Doette s'est en estant drecie, 
voit l'escuier, vers lui s'est adrecie. 
En son cuer est dolante et correcie 
por son seignor dont ele ne voit mie. 
E [or en ai dol.]

V.
Bele Doette li prist a demander: 
- ou est mes sires cui je doi tant amer? - 
- En non deu, dame, ne.l vos quier mais celer: 
morz est mes sires, ocis fu au joster. 
E or [en ai dol.]

VI.
Bele Doette a pris son duel a faire.
- Tant mar i fustes, cuens Do, frans debonaire. 
Por vostre amor vestirai je la haire, 
ne sor mon cors n'avra pelice vaire. 
E or en ai dol: 
por vos devenrai nonne en l'eglyse saint Pol.

VII.
Por vos ferai une abbaïe tele, 
qant iert li jors que la feste iert nomeie; 
se nus i vient qui ait s'amor fauseie, 
ja del mostier ne savera l'entreie. 
E or en ai dol: 
por vos devenrai nonne a l'eglise saint Pol. -

VIII.
Bele [Doette] prist s'abaiie a faire, 
qui mout est grande et adès sera maire, 
toz cels et celes vodra dedanz atraire 
qui por amor sevent peine et mal traire. 
E or en ai dol: 
por vos devenrai nonne a l'eglise saint Pol.