I.
Anc mais no·m fo semblan
qu'ieu laixes per Amor
solatz, ni per joi chan,
ni plores per douzor:
be·m ten e son coman
Amors qu'e mi comenza
mantz doutz plazers, e cre
c'ad obs de leis me fe
Dieus e per sa valenza.
II.
Qu'ie·m vau soven claman
de leis on fatz lauzor,
e vau leis mercejan
don degra far clamor,
res non fatz per enjan.
Mas cel cui Amors genza
deu sofrir manta re,
car e mantz luecs s'ave
qe mal tain c'ab be·l venza.
III.
No·s deu plainer d'afan,
ni dire sa dolor,
ni conoixer son dan,
ni del be far lauzor
amics qe va camjan
en van sa captenenza.
Maint en parlon dese
qe no sabon de qe
mou jois ni malsabenza.
IV.
Eu no sai d'amor tan
qe·n parle ses temor,
mas vist ai c'ap joi gran
trop ris non an sabor
e mans sospirs que fan
de feiner gran parvenza.
Per c'Amors me capte,
aixi com miels cove,
ses blasme e ses faillenza.
V.
Dona, ·l plus fin aman
son, e·l miels sofridor,
et aicel que miels blan
sa dona e sa valor.
Mandatz senes desman
per vostra conoixenza
zo que us estara be.
Sens o que no me·n te
nuilla res mas temenza.
VI.
Si·m destreinetz pessan
qe mantas vetz, cant or,
vos cuig esser denan.
Qe la fresca color
e·l bel cors benestan
tenc en tal sovinenza
de ren als no·m sove.
D'aquest douz pes m'ave
qe li ei benvolenza.
