![Versione stampabile Versione stampabile](https://letteraturaeuropea.let.uniroma1.it/sites/all/modules/print/icons/print_icon.gif)
![PDF version PDF version](https://letteraturaeuropea.let.uniroma1.it/sites/all/modules/print/icons/pdf_icon.gif)
I
Ben vuelh que sapchon li pluzor
d'est vers si·s de bona color
qu'ieu ai trag de mon obrador,
qu'ieu port d'ayselh mestier la flor,
et es vertatz,
e puesc en trair lo vers auctor,
quant er lassatz.
II
Ieu conosc ben sen e folhor
e conosc anta e henor
et ai ardimen et paor;
e si·m partez un jeuc d'amor,
no suy tan fatz
no·n sapcha triar lo melhor
entre·ls malvatz.
III
Ieu conosc ben selh qui be·m di
e selh qui·m vol mal atressi,
e conosc ben selluy qui·m ri;
e si·ll pro s'auzaton de mi,
conosc assatz
qu'atressi dey voler lor fi
e lor solatz.
IV
Ja ben aya selh qui·m noyri,
que tan bo mestier m'eschari
que anc a negu non falhi,
que de jogar sobre coyssi,
a totz tocatz,
mais en say que nulh mo vezi,
qual que·m vejatz.
V
Dieus en lau e sanh Jolia:
tant ai apres del juec doussa
que sobre totz n'ai bona ma,
e selh qui cosselh mi querra
non l'er vedatz
ni us de mi non tornara
descosselhatz.
VI
Qu'ieu ai nom "maistre certa":
ja m'amigu'anueg no m'aura
que no·m vuelh'aver l'endema,
qu'ieu suy d'aquest mestier, s'o·m va,
tan ensenhatz
que be·n sai gazanhar mon pa
en totz mercatz.
VII
Pero no m'auzetz tan gaubier
qu'ieu non fos rahuzatz l'autrier,
que jogav'a un joc grossier,
que·m fon trop bos el cap premier,
tro fo taulatz;
quan guardiey, no m'ac plus mestier:
si·m fon camjatz.
VIII
Mas elha·m dis un reprovier:
"Don, vostre datz son menudier!"
"Et ieu revit vos a doblier,
fis·m ieu: qui·m dava Monpeslier
non er laissatz!"
E leviey un pauc son taulier
ab ams mos bratz.
IX
E quan l'aic levat lo taulier,
empeys los datz:
e·ill duy foron cairat vallier
e·l terz plombatz.
X
E fi·l ben ferir al taulier,
e fon joguatz.