I.
Quan lo rossinhols el follos
dona d’amor e·n quier e·n pren,
e mou son chant jauzent joyos,
e remira sa par soven,
e·l riu son clar e·l prat son gen,
pel novel deport que·y renha,
mi ven al cor grans joys jazer.
II.
D’un’amistat suy enveyos --
quar no sai joya plus valen --
c’or e dezir, que bona·m fos
si·m fazia d’amor prezen;
que·l cors a gras, delgat e gen,
e ses ren que·y descovenha,
e s’amors bon’ab bon saber.
III.
D’aquest’amor suy cossiros
vellan e pueys sompnhan dormen,
quar lai ay joy meravelos
per qu’ieu la jau joyos, jauzen;
mas sa beutatz no·m val nien,
quar nulhs amicx no m’essenha
cum ieu ja n’aya bon saber.
IV.
D’aquest’amor suy tan cochos
que quant ieu vau ves lieys corren,
vejaire m’es qu’a reüsos
m’en torn e que lay·s n’an fugen;
e mos cavals y cor tan len…
a greu cug mais que·y atenha,
s’amors no la·m fay remaner.
V.
Amors, alegres part de vos,
per so quar vau mo mielhs queren;
e suy en tant aventuros
qu’enqueras n’ay mon cor jauzen,
la merce de mon Bon Guiren
que·m vol e m’apell’e·m denha,
e m’a tornat en bon esper.
VI.
E qui sai rema deleytos
e Dieu non siec en Bethleem,
no sai cum ja mais sia pros,
ni cum ja venh’a guerimen;
qu’ieu sia e cre, mon escien,
que selh qui Jhesus ensenha
segura escola pot tener.