I.
“Car vey fenir a tot dia
[l'amor], lo joi, e·l deport,
e no·m socor la clerzia,
non puesc mudar no·m cofort
co fay, can conois sa mort,
lo signes, que bray e cria
e·n mou son sonet per fort,
que·l cove fenir sa via,
e plus no·i a de conort.”
II.
“Maïstre, si Dieus me valha,
ben dizetz so que cove;
mas ja d’aisso no vos calha
car li clerc no vos fan be;
car lo bos temps ve, so cre,
qe auretz aital guazalha
qe vos dara palafre,
o renda que mais vos valha,
car lo coms de Peitieus ve.”
III.
“Guilhalmi, non pretz mealha
so que·m dizes, per ma fe;
mais volria una calha
estreg tener en mon se
no faria un polhe,
qu’estes en autrui sarralha,
c’atendes la lor merce;
car soven, so cug, badalha
qui s’aten a l’autrui be.”
IV.
“Maïstre, gran benanansa
podetz aver si sofretz.”
“Guilhalmi, vostra vanansa
non crei, si com vos dizetz.”
“Maïstre, car no·m crezetz?
Grans be vos venra de Fransa
si atendre lo voletz.”
“Guilhalmi, tal esperansa
vos don Dieus com vos m’ufretz.”
V.
“Maïstre, n’ajatz coratge
d’efan ni d’ome leugier.”
“Guilhalmi, sobre bon guatge
vos creyria volontier.”
“Maïstre, man bon destrier
an li home de paratge,
per sufertar al derrier.”
“Guilhalmi, fort e salvatge
...........................”
VI.
“Maïstre, josca la brosta
vos pareisa·l teit novel.”
“Guilhalmi, ben pauc vos costa
lo mieus ostals del castel.”
“Maïstre, conte novel
aurem nos a Pantacosta,
que·us pagara ben e bel.”
“Guilhalmi, fols es qui·us escota:
vos pagatz d’autrui borcel.”